ज्या झाडाखाली भावाने आयुष्य संपवलं, ठीक दोन वर्षांनी तिथेच दादा-वहिनीने आरोपीचा काटा काढला.

गुढीपाडव्याच्या दिवशी परळी तालुक्यात खळबळजनक घटना समोर आली आहे. भाऊ आणि भावजयने मिळून एका तरुणाची हत्या केली. या हत्येमागे त्यांनी पोलिसांत जात कारणही सांगितलं आहे.बीड जिल्ह्यात गुन्हेगारीच्या घटनांमध्ये सतत वाढ होत आहे. ईदच्या एक दिवस आधी रविवारी, ३० मार्च रोजी मशिदीजवळ एक बॉम्ब स्फोटाची घटना समोर आली होती. ही घटना ताजी असतानाच बीडमध्ये सोमवारी आणखी एक धक्कादायक प्रकार समोर आला आहे. भावाच्या मृत्यूचा बदला घेण्यासाठी त्याच्या भावाने आणि भावजयने मिळून एका तरुणाची दगडाने ठेचून हत्या केल्याची घटना उघड झाली आहे. या घटनेनंतर परिसरात एकच खळबळ माजली आहे.ही घटना बीडमधील परळी तालुक्यातील सिरसाळा परिसरातील कान्हापूर येथे घडली. सूत्रांनी दिलेल्या माहितीनुसार, मार्च २०२३ मध्ये अविनाश देशमुख या तरुणाने आत्महत्या केली होती.

त्याच्या आत्महत्येला स्वप्नील उर्फ बबलू देशमुख जबाबदार असल्याचा आरोप होत होता. या प्रकरणी स्वप्नील उर्फ बबलू देशमुखवर गुन्हा दाखल झाला होता. मात्र, अविनाश देशमुखच्या आत्महत्येप्रकरणी स्वप्नीलवर दाखल झालेला गुन्हा मागे घेण्यासाठी स्वप्नील आत्महत्या केलेल्या अविनाशच्या कुटुंबीयांवर दबाव टाकत होता.स्वप्नील सतत दाखल झालेला गुन्हा मागे घेण्यासाठी आत्महत्या केलेल्या अविनाशच्या कुटुंबीयांना त्रास देत होता. याच त्रासाला कंटाळून अविनाशचा भाऊ धनंजय देशमुख आणि भावजय सोनाली देशमुख यांनी स्वप्नीलची गळा चिरुन आणि दगडाने ठेचून हत्या केली.

महत्त्वाची बाब म्हणजे, ज्या झाडाला अविनाश देशमुखने गळफास घेऊन आयुष्य संपवलं होतं, त्याच ठिकाणी, त्याच झाडाखाली अविनाशच्या भाऊ आणि भावजयने स्वप्नीलचा काटा काढला. अविनाशने आत्महत्या केलेल्या झाडाखालीच त्याला संपवलं.गुढीपाडव्याच्या दिवशीच घडलेल्या या घटनेने संपूर्ण जिल्हा हादरला आहे. हत्या केल्यानंतर धनंजय आणि सोनाली स्वतःच सिरसाळा पोलीस ठाण्यात हजर झाले. पोलिसांनी दोघांवर गुन्हा दाखल केला असून, स्वप्नीलच्या त्रासामुळेच हा टोकाचा निर्णय घ्यावा लागला, अशी प्राथमिक माहिती याप्रकरणी समोर आली आहे.