साखरपुड्यासाठी पाहुणे जमले, पण नवरदेवाच्या अंत्ययात्रेला जाण्याची वेळ, सारं गाव रडलं, नेमकं काय घडलं?

अर्धापूर तालुक्यातील महेशसिंह ठाकूर याचा साखरपुड्याच्या आधी दुर्दैवी मृत्यू झाला. हिटरच्या पाण्याची टाकी अंगावर पलटल्याने त्याला ६५ टक्के भाजले आणि उपचारादरम्यान त्याचा मृत्यू झाला. त्याच्या घटनेने दोन्ही कुटुंबे शोकसागरात बुडाली, लव्हस्टोरी अधुरीच राहिली.नातलगातील मुलीसोबत प्रेम, त्यांच्या प्रेम विवाहाला दोन्ही कुटुंबाची सहमती, साखरपुडा होणार असल्याने नवरदेव आनंदी होता. आपल्या हातावर मेहंदी देखील लावली, मात्र साखरपुडा कार्यक्रमाच्या आधीच नवरदेवावर काळाने घाला घातला. हिटरच्या पाण्याची टाकी अंगावर पलटलण्याने ६५ टक्के भाजलेल्या नवरदेवाचा उपचारा दरम्यान मृत्यू झाला. जिल्ह्यातील अर्धापूर तालुक्यात ही दुर्देवी घटना घडली. बोहल्यावर चढण्यापूर्वी नवरदेवाचा मृत्यू झाल्याने हळहळ व्यक्त केली जातं आहे. महेशसिंह ठाकूर असं मयत तरुणाचं नाव आहे.

मयत महेश ठाकूर हा अर्धापूर तालुक्यातील मेंढला (बु) येथील रहिवासी आहे. हैदराबाद येथे तो काम करत होता. यावेळी नातलगातील मुलीसोबत सूत जुळले. दोघांनी विवाह करण्याचे ठरवले. दोघेजण नातलगातील असल्याने दोघांच्या कुटुंबियांनी विवाहाला सहमती दर्शवली. त्यानंतर आठवड्यापूर्वी साखरपुडा होणार होता.नवरदेवाने हाताला मेहंदी लावून स्लॅपवर झोपला होता, बाजूला असलेली हिटरची गरम पाण्याची टाकी पलटली, त्यात तो ६५ टक्के भाजला. कुटुंबियांनी तात्काळ महेशसिंहला रुग्णालयात दाखल केले. तब्बल नऊ दिवस त्याने मृत्यूशी झुंज दिली, त्याला वाचण्यासाठी डॉक्टरांचे शर्तीचे प्रयत्न सुरु होते, अखेर घटनेच्या नवव्या दिवशी त्याची प्राणज्योत मालवली. त्याच्या पश्चात आई वडील, बहीण भाऊ असा परिवार आहे. साखरपुड्यासाठी आलेले पाहुणेही घरातच होते. साखरपुड्यास जाणाऱ्या नातेवाईकांना नवरदेवावर अंत्यसंस्कार करण्याची वेळ नियतीने आणली. संसाराच्या वेलावर पदार्पण करण्याआधीच नवरदेवाची अंत्ययात्रा निघाली अन संसार थाटण्याचे स्वप्न आणि प्रेमाची ती कहाणी अधुरीच राहिली. हृदय पिळवटून टाकणाऱ्या या घटनेमुळे सगळीकडे हळहळ व्यक्त केली जात आहे. या घटनेने दोन्ही कुटुंब शोकसागरात बुडाले.