बारामती नगरपालिकेत ऑपरेटरपासून नगररचनाकारापर्यंत मोठी साखळी, नगररचना अधिकाऱ्याला लाच घेताना अटक.

बारामतीमध्ये एका नगररचना अधिकाऱ्याला लाच घेताना अटक करण्यात आली असून त्याला एक दिवसाची पोलीस कोठडी सुनावण्यात आली आहे.गेल्या दहा वर्षात बारामती तालुक्याच्या स्तरावरील सर्वात मोठे सुंदर शहर बनले. विकसित शहर बनले. पण त्याच्याबरोबर मोकळी वागणूक मिळणाऱ्या आणि स्वातंत्र्य मिळणाऱ्या अधिकाऱ्यांनी त्याचा गैरफायदा घेत या शहरातील विकास कामांना भ्रष्टाचाराची जोड दिली. या अधिकाऱ्यांना कशात किती पैसे खावे हेच कळेना, त्यामुळे इथले व्यवसायिक व्यापारी विक्रेते देखील वैतागून गेले आहेत. बुधवारी बारामतीत बांधकाम व्यवसायिकाकडून तब्बल एक लाखाची लाच घेताना बारामतीच्या नगरपालिकेचा नगररचना अधिकारी विकास ढेकळे हा लाच लुचपत प्रतिबंधक विभागाने रंगेहाथ पकडलं. त्याला बारामतीच्या न्यायालयाने एक दिवसाची पोलीस कोठडी दिली.विकास ढेकळे हा बारामतीतील बांधकाम व्यवसायिक भागवत चौधर यांच्याकडे त्यांनी सादर केलेल्या प्रस्तावाच्या बिनचूक पावणेदोन लाखांची लाच मागितली होती. अखेर वैतागलेल्या भागवत चौधर यांनी लाच लुचपत प्रतिबंधक विभागाचे कार्यालय गाठले. तेथे पडताळणी केल्यानंतर ढेकळे याने लाच मागितल्याचे निष्पन्न झाले. त्यावरून तडजोडी आणखी एक लाख रुपये लाच ठरली आणि तीच स्वीकारताना बारामतीतील ऑक्सिजन जिममध्ये ढेकळे याला रंगेहाथ पकडले.

खरे तर बांधकाम व्यवसायातून बारामतीला विकासाची नवी दृष्टी मिळाली. मात्र याच बांधकाम व्यवसायाला भ्रष्टाचाराचे कुरण अधिकाऱ्यांनी बनवले. उपमुख्यमंत्री अजित पवार यांनी गेल्या दहा वर्षात बारामतीत लोकाभिमुख कामे वेळेत मार्गी लागावी, यासाठी अधिकाऱ्यांना मोकळीक दिली. मात्र या “फ्री”हँडचा अधिकाऱ्यांनी गैरवापर करून घेतला. अजित पवार बारामतीत असतील, तेव्हा पुढे पुढे करायचे आणि इतर वेळी नागरिकांना नडायचे हा प्रकार बारामतीत गेल्या काही वर्षांपासून सातत्याने सुरू आहे. त्यामुळेच निवडणुकीच्या काळात “मलिदा गॅंग” हा शब्द बारामतीतून अख्ख्या राज्यभरात रूढ झाला. काल बारामतीत विकास ढेकळेला पकडल्यानंतर बारामतीच्या बांधकाम व्यवसायिकांची संघटना असलेल्या क्रेडाई या संस्थेने विकास ढेकळेवर कडक आणि कठोर कारवाई करण्याची मागणी केली आहे.विकास ढेकळे हा याच विभागात सातत्याने काम करत होता. पैशाशिवाय त्याचे पान हलत नव्हते. तो कोणत्याही राजकीय पदाधिकाऱ्याला देखील जुमानत नव्हता. गेल्या तीन चार वर्षात त्याने भरपूर माया जमवल्याची चर्चा देखील बारामती शहरात सुरू होती. मात्र त्याच्या विरोधात कोणी बोलत नव्हते. बांधकाम व्यवसायिक भागवत चौधर यांनी मात्र धाडस केले.

काल संध्याकाळी बारामतीत जेव्हा ढेकळेला पकडले तेव्हा बांधकाम व्यावसायिकांनी अक्षरशः आनंद व्यक्त केला.गेल्या काही वर्षात बारामतीमध्ये अधिकाऱ्यांचा भ्रष्टाचार जणू शिष्टाचाराचा भाग बनल्याची परिस्थिती आहे. लोकसभा निवडणुकीच्या आधी काही महिनेच खुद्द उपमुख्यमंत्री अजित पवार यांच्या समोरच काटेवाडीतील ग्रामस्थांनी तत्कालीन प्रांत अधिकारी यांची तक्रार केली होती. संत तुकाराम महाराज राष्ट्रीय महामार्गाच्या भूसंपादनामध्ये या कार्यालयातील अधिकारी व कर्मचारी आम्हाला टक्केवारी मागतात आणि आमच्याकडून पैसे घेतात अशी ती तक्रार होती. गेल्या काही महिन्यांपासून विविध शासकीय खात्यांचा भ्रष्टाचाराचा अक्षरशः नंगानाच सुरू आहे. मात्र लोक आपल्या तालुक्याची आणि आपल्या नेत्याची प्रतिष्ठा लक्षात घेऊन गप्प बसत आहेत. मात्र आता किती काळ गप्प बसणार? असा प्रश्न मात्र त्यांना पडला आहे.यापूर्वी देखील बारामती विभागाच्या नगरचना करायला अटक करून त्याचा मोठा घोटाळा बाहेर काढण्यात आला. आता नगरपालिकेचा नगररचनाकार या साखळीत आला आहे, मात्र सापडला तो चोर बाकीचे साव कसे असा प्रश्न आता सध्या शहरात विचारला जात आहे. कारण बारामती नगरपालिकेत अगदी ऑपरेटर पासून ते नगररचनाकरापर्यंत भ्रष्टाचाराची मोठी साखळी कार्यरत आहे आणि ती कोणीही तोडू शकत नाही असेच बोलले जाते. त्यामुळेच नगरसेवकापर्यंत सुद्धा कोणाचीही ताकद ही साखळी तोडण्याची नाही अशीच चर्चा आहे.