छत्तीसगडमध्ये ३० माओवादी ठार; सुरक्षा दलांसोबत चकमकी, एक जवान हुतात्मा.

छत्तीसगडच्या विजापूर आणि कांकेर जिल्ह्यात सुरक्षा दलांसोबत झालेल्या दोन चकमकींमध्ये ३० माओवादी ठार झाले. यामध्ये एक जवान हुतात्मा झाला आहे.छत्तीसगडच्या विजापूर आणि कांकेर जिल्ह्यात सुरक्षा दलांसोबत झालेल्या दोन चकमकींमध्ये ३० माओवादी ठार झाले. यामध्ये एक जवान हुतात्मा झाला आहे. पोलिस अधिकाऱ्यांनी गुरुवारी याबाबत माहिती दिली.बिजापूर जिल्ह्यात २६ माओवादी ठार झाले. तर एक जवान हुतात्मा झाला. कांकेरमध्ये चार माओवादी मारले गेले. राज्य पोलिसांचे जिल्हा राखीव दल (डीआरजी) आणि सीमा सुरक्षा दलाने (बीएसएफ) संयुक्तपणे ही मोहीम राबवली. ‘गंगालूर पोलिस ठाण्याच्या हद्दीत सुरक्षा दलांच्या संयुक्त पथकाने माओवाद्यांविरोधात मोहीम हाती घेतली. विजापूर आणि दंतेवाडा जिल्ह्याच्या सीमावर्ती क्षेत्रातील जंगलात सकाळी ७ वाजण्याच्या सुमारास चकमक सुरू झाली. घटनास्थळावरून २६ माओवाद्यांचे मृतदेह हाती घेण्यात आले. स्फोटकेही जप्त करण्यात आली,’ असा तपशील बस्तर रेंजचे पोलिस महानिरीक्षक सुंदरराज पी. यांनी दिला.

‘डीआरजी’चा एक जवान या गोळीबारात हुतात्मा झाला, असेही त्यांनी सांगितले.दुसऱ्या घटनेत डीआरजी आणि बीएसएफचे संयुक्त पथक माओवाद्यांविरोधी मोहिमेवर असताना कांकेर आणि नारायणपूर जिल्ह्यांच्या सीमेजवळ असलेल्या जंगलात चकमक झाली. ‘कारवाईनंतर या घटनास्थळावरून चार माओवाद्यांचे मृतदेह हाती घेण्यात आले. तसेच स्वयंचलित शस्त्रेही हस्तगत करण्यात आली,’ अशी माहिती कांकेरच्या पोलिस अधीक्षक इंदिरा कल्याण इलेसेला यांनी दिली. चकमकीच्या दोन्ही ठिकाणांवर शोधमोहिमा सुरू आहेत. दरम्यान, आत्तापर्यंत छत्तीसगडमध्ये विविध चकमकींत ११३ माओवादी मारले गेले.छत्तीसगडमधील नारायणपूर जिल्ह्यात गुरुवारी पहाटे माओवाद्यांनी एका आयईडीचा स्फोट घडवून आणला.

यामध्ये सुरक्षा दलांचे एक पथक थोडक्यात बचावले, असे पोलिसांनी सांगितले. या स्फोटात सुरक्षा दलाच्या जवानांना गंभीर इजा झाली नाही. मात्र एका अधिकाऱ्यासह दोन पोलिसांच्या डोळ्यांत स्फोटामुळे उडालेली धूळ आणि माती गेल्याने त्यांना त्रास जाणवू लागला. यामुळे त्यांच्यावर उपचार करण्यासाठी त्यांना बाहेर काढण्यात आले. ही घटना अबुझमाड येथे गुरुवारी पहाटे ३ वाजता घडली. यावेळी डीआरजी आणि विशेष कृती दलाचे संयुक्त पथक माओवाद्यांविरोधातील मोहिमेवर होते. माओवाद्यांचा शोध घेण्यासाठी या परिसरात ‘कोम्बिंग ऑपरेशन’ सुरू आहे.या मोहिमेचे केंद्रीय गृहमंत्री अमित शहा यांनी कौतुक केले. ‘माओवादमुक्त भारत मोहिमेच्या दिशेने हे मोठे यश आहे. नरेंद्र मोदी सरकार माओवाद्यांविरुद्ध निर्दयी दृष्टिकोन ठेवून पुढे जात आहे. सर्व सुविधा देऊ करूनही शरणागती न पत्करणाऱ्या माओवाद्यांविरुद्ध शून्य सहिष्णूता धोरण अवलंबले जात आहे. पुढील वर्षी ३१ मार्चपर्यंत देश माओवादमुक्त होईल,’ अशी पोस्ट शहा यांनी ‘एक्स’वर केली आहे.