कार्बन मोनॉक्साईड इनसाईड, डोन्ट स्वीच ऑन लाईट; चिठ्ठी लिहून तरुणानं विचित्र प्रकारे जीव दिला.

 कार्बन मोनॉक्साईड इनसाईड.. डोन्ट स्वीच ऑन लाईट अशी सावधगिरी बाळगण्याची चिठ्ठी बंगल्याच्या बेडरुमच्या दरवाजाबाहेर चिकटवून कार्बन मोनॉक्साईड वायू प्राशन करून तरुणाने आत्महत्या केल्याची विचित्र अशी घटना वसई परिसरात घडली आहे. कार्बन मोनॉक्साईड इनसाईड.. डोन्ट स्वीच ऑन लाईट अशी सावधगिरी बाळगण्याची चिठ्ठी बंगल्याच्या बेडरुमच्या दरवाजाबाहेर चिकटवून कार्बन मोनॉक्साईड वायू प्राशन करून तरुणाने आत्महत्या केल्याची विचित्र अशी घटना वसई परिसरात घडली आहे. श्रेय अग्रवाल (वय २७) असे आत्महत्या केलेल्या तरुणाचे नाव आहे.वसई पूर्व परिसरात असलेल्या चिंचोटी- कामण परिसरातील स्पॅनिश विला नावाच्या बंगल्यात श्रेय अग्रवाल हा तरुण वास्तव्यास होता. मागील दोन दिवसांपासून श्रेयची बहीण त्याच्याशी संपर्क करण्याचा प्रयत्न करत होती. मात्र त्याच्याशी कोणत्याही प्रकारचा संपर्क झाला नाही. त्यामुळे त्याच्या बहिणीने मुंबई पोलीस आयुक्तांना ईमेलद्वारे श्रेय अग्रवाल हा आपला भाऊ बेपत्ता असल्याची तक्रार केली. मुंबई गुन्हे शाखेने श्रेय अग्रवालच्या मोबाईलचे लोकेशन तपासले असता ते वसईच्या चिंचोटी- कामण परिसरात असल्याचे समोर आले. त्यानंतर याबाबत अधिक तपास करण्यासाठी सदर घटनेची माहिती व श्रेय अग्रवाल याचे छायाचित्र नायगाव पोलिसांना देण्यात आले.

नायगाव पोलिसांनी स्पॅनिश विला परिसरात चौकशी केली असता विला नंबर ६ या बंगल्यात श्रेय अग्रवाल राहत असल्याची माहिती स्थानिकांनी दिली. पोलीस बंगल्यात गेले असता बंगला पूर्णपणे बंद होता आणि त्यातून दुर्गंधी येत होती. पोलिसांनी बंगल्यात प्रवेश केला. बंगल्यातील एका बेडरूमचा दरवाजा लॉक असल्याचे आढळून आले. या बेडरूमच्या दरवाजा बाहेर कार्बन मोनॉक्साईड इनसाईड.. डोन्ट स्वीच ऑन लाईट अशा आशयाची इंग्रजी भाषेत लिहिलेली चिठ्ठी आढळून आली.चिठ्ठीतील मजकूर वाचून पोलिसांनी आत प्रवेश न करता अग्निशमन दलाला पाचारण केले. अग्निशमन दलाचे जवान घटनास्थळी दाखल झाले. पीपीई किट व मास्क परिधान करून हायड्रॉलिक स्प्रेडर कटरच्या मदतीने घरातील बेडरूमचा दरवाजा उघडून आत प्रवेश केला. यावेळी अग्निशमन दलाला धक्कादायक दृश्य समोर दिसले. श्रेय अग्रवालने कार्बन मोनॉक्साईडच्या सिलेंडरला आपले दोन्ही हात बांधून डोक्यात क्रिकेट खेळण्याचे हेल्मेट घातले होते. कार्बन मोनॉक्साईड सिलेंडरला नळी जोडलेली आणि ही नळी तोंडाला लावलेल्या नेब्युलायझरला जोडली होती. या नेब्युलायझरच्या मदतीने सिलेंडरमधील कार्बन मोनॉक्साईड वायू श्रेय याने तोंडात ओढून घेतला आणि आत्महत्या केली.अग्निशमन दलाने सावधगिरी बाळगत चाकूने नेब्युलायझरला व सिलेंडरला जोडलेली नळी कापली. त्यानंतर पोलिसांनी मृतदेह ताब्यात घेत शवविच्छेदनासाठी पाठवला. पोलिसांनी घटनास्थळाचा पंचनामा केला असून घटनास्थळी पाच कार्बन मोनॉक्साईडचे सिलेंडर आढळले आहेत. आत्महत्या केलेल्या बेडरूममध्ये कसा प्रवेश करावा याची सूचना एका चिठ्ठीत श्रेय याने लिहून ठेवली होती. घरातील खिडक्यांना लाकडी प्लाय लावून घर बंद केले होते. वायू बाहेर पसरू नये यासाठी देखील त्याने खबरदारी घेतली होती.
घटनास्थळी सुसाईड नोटदेखील आढळली असून गंभीर आजाराने त्रस्त असल्याने कार्बन मोनॉक्साईड वायू प्राशन करून आत्महत्या करत असल्याचे या सुसाईड नोटमध्ये त्याने म्हटले आहे. याप्रकरणी नायगाव पोलीस ठाण्यात अकस्मात मृत्यूची नोंद करण्यात आली असून अधिक तपास पोलीस करत आहेत.