संतोष देशमुख हत्या प्रकरणात मोठी अपडेट, अवादा कंपनीच्या तिन्ही वॉचमनचे जबाब समोर, कराडच्या नावाचा स्पष्ट उल्लेख.

 बीड येथील सरपंच संतोष देशमुख यांच्या हत्या प्रकरणात, पोलिसांनी दाखल केलेले १५००+ पानांचे आरोपपत्र समोर आले आहे. मंत्री धनंजय मुंडे यांचे निकटवर्तीय वाल्मिक कराड आणि त्याचा भाऊ विष्णू चाटे आरोपी आहेत. तीन वॉचमनच्या जवाबांमुळे गुन्ह्याची माहिती उघड झाली असून, त्यात खंडणीची धमकी आणि मारहाणीचे ठळक मुद्दे आहेत. संतोष देशमुख हत्या प्रकरणाबाबत पोलिसांनी जवळजवळ १५०० पेक्षा जास्त पानांचे आरोपपत्र दाखल केले होते. यामध्ये मंत्रीव धनंजय मुंडे यांचा उजवा हात असणारा वाल्मिक कराड हा आरोपी क्रमांक आहे. तर त्याचा भाऊ विष्णू चाटे याला आरोपी क्रमांक दोन केलं आहे. या आरोपपत्रामधून रोज नवनवीन खुलासे होत आहेत. अशातच ज्या वॉचमनला अवादा कंपनीच्या गेटवर मारहाण झाली त्यांनी आपले जबाब दिले आहेत. या तिघांनी दिलेले जबाब महत्त्वाचे ठरले असून सोनवणे यांनी सुदर्शन घुले याला काय शिवीगाळ केली याबाबत सविस्तरणपणे त्यांनी आपल्या जबाबात माहिती दिली आहे.

सरपंच संतोष देशमुख यांच्या हत्या प्रकरणात अवादा एनर्जी प्रकल्पावरील तीन वॉचमनचा जबाब महत्त्वाचा ठरला. या वॉचमनचे जवाब महाराष्ट्र टाईम च्या हाती लागले आहेत. अशोक सोनवणे, अमरदीप सोनवणे आणि भैय्यासाहेब सोनवणे हे तिघेजण आवादा एनर्जी प्रकल्पावर वॉचमन म्हणून कार्यरत होते. या ठिकाणी ड्युटीवर असताना सुदर्शन घुले त्याच्या साथीदारासह आवादा एनर्जी प्रकल्पावर आला. यावेळी सुदर्शन घुलेने या वॉचमनना मारहाण केली. तसेच जातीवाचक शिवीगाळ केल्याने या प्रकरणात ॲट्रॉसिटी ॲक्ट प्रमाणे गुन्हा देखील नोंद आहे.आवादा एनर्जी प्रकल्पाचे मॅनेजर शिवाजी थोपटे यांना सुदर्शन घुले आणि त्याच्या साथीदाराने याच वॉचमन समोर दोन कोटी रुपयांची खंडणी मागितली. ही खंडणी नाही दिली तर कंपनी बंद करा अशी धमकी देखील दिली होती. हे भांडण सोडवण्यासाठी सरपंच संतोष देशमुख या ठिकाणी पोहोचले होते.कंपनी बंद करू नका. लोकांना रोजगार मिळू द्या. असे सुदर्शन घुले आणि त्याच्या साथीदारांना सरपंच देशमुख म्हणत होते. त्यावेळी सुदर्शन घुलेने सरपंच देशमुख यांना सरपंच तुला बघून घेऊ. तुला जिवंत सोडणार नाही.. अशी धमकी दिली, असा जबाब वॉचमनने दिला आहे.
दरम्यान, या जबाबामुळे आता पोलिसांना वाल्मिक कराडविरोधात आणखी एक सबळ पुरावा सापडला आहे. याच भांडणावेळी देशमुखांसह गावकऱ्यांनी घुले आणि त्याच्या सहकाऱ्यांना मारहाण करून हुसकावलं होतं. त्यानंतर तीन दिवसांनी देशमुखांची हत्या करण्यात आली होती.