टकलाची समस्या संपणार! जाहिरात पाहून मेडिकल कॅम्पला गर्दी; आता ६५हून अधिक जण रुग्णालयात भरती.

टक्कल पडल्यानं उपचार करण्यासाठी रुग्णालयात पोहोचले आणि डोळ्यांवर पट्टी बांधून पडून राहिले. केस उगवतील या आशेवर आलेल्या अनेकांना आता नीटसं दिसत नाही. एखाद्या चित्रपटात शोभेल असा प्रकार प्रत्यक्षात घडला आहे. टक्कल पडल्यानं उपचार करण्यासाठी रुग्णालयात पोहोचले आणि डोळ्यांवर पट्टी बांधून पडून राहिले. केस उगवतील या आशेवर आलेल्या अनेकांना आता नीटसं दिसत नाही. एखाद्या चित्रपटात शोभेल असा प्रकार प्रत्यक्षात घडला आहे. पंजाबच्या संगरुरमध्ये ही चक्रावून टाकणारी घटना घडली आहे. यामुळे सगळ्यांनाच आश्चर्याचा धक्का बसला आहे. डोक्यावर लावलेल्या औषधानं डोळ्यांची समस्या उद्भवू लागताच परिसरात खळबळ उडाली.

टक्कल पडल्यानं त्रस्त झालेल्यांसाठी एक चमत्कारी कॅम्पचं आयोजन करण्यात आलं होतं. काही दिवसांत डोक्यावर पुन्हा केस येतील, असा दावा करण्यात आला. पण प्रत्यक्षात उलट घडलं. त्यांच्या डोळ्यांमध्ये जळजळ होऊ लागली. त्यामुळे त्यांना रुग्णालयात दाखल व्हावं लागलं. काही दिवसांपूर्वी मेरठमध्ये घडलेल्या घटनेची पुनरावृत्ती आता संगरुरमध्ये घडली आहे.संगरुरच्या काली देवी मंदिरात एक मेडिकल कॅम्प आयोजित करण्यात आला होता. त्यात शेकडो लोक पोहोचले. या कॅम्पची सोशल मीडियावर जोरदार चर्चा होती. चमत्कारी औषधानं केस गळायचे थांबणार आणि नवे केस येणार, असा दावा करण्यात आला. त्यामुळे टक्कल पडलेले, टक्कल पडू लागलेले अनेक जण औषध घेण्यासाठी गेले.पुन्हा एकदा डोक्यावर घनदाट केस येतील या आशेनं अनेकांनी डोक्याला औषध लावलं. त्यानंतर त्यांच्या डोळ्यांमध्ये जळजळ सुरु झाली. बघता बघता परिस्थिती बिघडली. ६५ हून अधिक जण रुग्णालयात पोहोचले. काहींनी खासगी दवाखाने गाठले. पोलिसांनी या प्रकरणाचा तपास हाती घेतला आहे. संगरुर पोलीस ठाण्यात डॉक्टर अमनदीप सिंह आणि तेजिंदर पाल यांच्याविरोधात एफआयआर नोंदवण्यात आला आहे. वैद्यकीय शिबिराचं आयोजन करणाऱ्यांविरोधात कारवाई करण्याची तयारीदेखील पोलिसांनी सुरु केली आहे.आतापर्यंत ६५ पेक्षा अधिक जण डोळ्यांत जळजळ आणि सुजेची समस्या घेऊन जिल्हा रुग्णालयात पोहोचल्याची माहिती जिल्हा रुग्णालयातील डॉक्टरांनी दिली. ‘रुग्णांपैकी काहींची प्रकृती सध्याच्या घडीला गंभीर आहे. या प्रकरणात वैद्यकीय चाचण्या सुरु आहेत,’ अशी माहिती सिव्हिल सर्जन संजय यांनी दिली.