ज्वाळांनी घेरलेली बस, जीव वाचवण्यासाठी तडफडणारे ‘ते’ चार जण; पुण्यातील थरकाप उडवणारं दृश्य.

पुण्यातील हिंजवडी परिसरात एका मिनी बसला आग लागली. या घटनेत चार जणांचा मृत्यू झाला आहे तर पाच जण जखमी झाले आहेत. या घटनेने पुण्यात एकच खळबळ माजली आहे.हिंजवडी पोलीस ठाणे हद्दीत फेज १ रोडवर व्योमा ग्राफिक्स या कंपनीची असणाऱ्या टेम्पो ट्रॅव्हल बसला अचानक आग लागली. यावेळी या ट्रॅव्हल्समधून १२ जण प्रवास करत होते. प्रवास करणाऱ्या १२ पैकी ४ कामगारांचा या दुर्घटनेत होरपळून मृत्यू झाला आहे. तर पाच जण जखमी असल्याची माहिती आहे. या वाहनामध्ये तांत्रिक बिघाड झाल्यामुळे गाडीने पेट घेतला आणि ही दुर्देवी घटना घडल्याची माहिती आहे.या भीषण दुर्घटनेत सुभाष भोसले (वय ४२), शंकर शिंदे (वय ६०), गुरुदास लोकरे (वय ४०), राजू चव्हाण ( वय ४०) (सर्व मृत राहणार पुणे) यांचा मृत्यू झाला आहे. हिंजवडी फेज १ रोडवर उपस्थितांच्या अंगावर तेव्हा काटा आला जेव्हा अग्निशमन दलाच्या जवानांनी या बसला लागलेली आग विझवली. समोरील दृश्य पाहून सारेच हादरुन गेले. ज्या चौघांचा या घटनेत मृत्यू झाला, त्यांच्या शरीराचा अक्षरश: कोळसा झाला होता.

मागच्या दाराने बाहेर येण्यासाठी ते प्रयत्न करत असतील, पण ते दार उघडलं नाही आणि तिथेच त्या चौघांनी आपला जीव सोडला. जेव्हा मिनी बसच्या मागचं दार उघडलं तेव्हा हे कर्मचारी एकावर एक पडलेले होते.याबाबत मिळालेल्या अधिक माहितीनुसार, सकाळच्या सुमारास हिंजवडी फेज वन येथे चालक कंपनीतील कर्मचाऱ्यांना घेऊन जात असताना चालकच्या पायाखाली असणाऱ्या गाडीच्या भागाला आग लागली. ही गोष्ट चालकाच्या लक्षात येताच चालक आणि त्याच्या गाडीच्या समोरच्या सीटवर बसलेले कर्मचारी तातडीने बाहेर पडले. मात्र, जे मागच्या बाजुला होते, त्यांना मागचा दरवाजा उघता आला नाही. त्यामुळे मागे बसलेल्या चार कर्मचाऱ्यांचा होरपळून मृत्यू झाला. या घटनेने प्रत्यक्षदर्शींच्या काळजाचे ठोके चुकले.

सकाळी कामावर निघालेल्या कर्मचाऱ्यांचा हा दिवस शेवटचं ठरणार असेल असा त्यांनी स्वप्नातही विचार केला नसेल. त्या चार जणांच्या कुटुंबांवर दुःखाचा डोंगर कोसळला आहे. या घटनेत इतर काही कर्मचारी जखमी झाले असून त्यांना जवळच्या खासगी रुग्णालयात दाखल करण्यात आले आहे. त्यांची प्रकृती स्थिर असल्याचे डॉक्टरांनी सांगितले आहे. वाहनाच्या इंजिनमध्ये तांत्रिक बिघाड असल्याची प्राथमिक माहिती समोर आली असून मागच्या दरवाज्यात काही बिघाड झाला होता का याचा तपास पोलिसांकडून सांगण्यात आले आहे.