विहिरीचं खोदकाम सुरु असताना मोठी दुर्घटना, अंगावर मलबा कोसळून दोन मजुरांचा दुर्दैवी अंत, पंचक्रोशीत हळहळ.

ब्लास्टिंगदरम्यान विहिरीत मशीनद्वारे छिद्र करण्याचं काम सुरु होते. याचवेळी अचानक विहिरीचा काही भाग खचून मजुरांच्या अंगावर मलबा पडल्याने दोन मजूर जागीच ठार झाले आहेत.रिसोड तालुक्यातील मोठेगाव येथील शेतात विहिरीचं खोदकाम सुरु असताना दुर्घटना घडली आहे. ब्लास्टिंगदरम्यान विहिरीत मशीनद्वारे छिद्र करण्याचे काम सुरु होते. याचवेळी अचानक विहिरीचा काही भाग खचून मजुरांच्या अंगावर मलबा पडल्याने दोन मजूर जागीच ठार झाले आहेत. आज दुपारच्या सुमारास ही दुर्घटना घडली आहे.

वृत्तानुसार, रिसोड तालुक्यातील मोठेगाव येथील शेतकरी रमेश धांडे यांच्या शेतातील विहिरीचे खोलीकरणाचे काम सुरू होते. याचवेळी विहिरीचा काही भाग अचानक खचून दोन मजुरांच्या अंगावर पडला. मोठ्या प्रमाणात मलबा अंगावर पडल्याने दोन्ही मजूर त्याखाली दबले गेले. तेथे उपस्थित इतर मजुरांनी त्यांना वाचवण्यासाठी अथक प्रयत्न केले. मात्र मलबा जास्त प्रमाणात असल्याने त्यांना तो हटवण्यासाठी वेळ लागला. नंतर क्रेनच्या साहाय्याने मलबा काढण्यात आला परंतु तोपर्यंत दोन्ही मजुरांचा दुर्देवी अंत झाला होता. पोलिसांनी घटनास्थळी धाव घेत दोन्ही मृतदेह ताब्यात घेतले आहेत. शवविच्छेदनासाठी रिसोड ग्रामीण रुग्णालयात दाखल केले आहेत.प्रल्हाद उकंडा देवकर रा. एकलासपूर आणि प्रकाश रावसाहेब देशमुख रा. मोठेगाव अशी मृत मजुरांचे नावं आहेत. हे दोघेही घरातील कर्ते व्यक्ती होते. त्यांच्या दुर्देवी मृत्यूनंतर दोन्ही कुटुंबीयांसह गावावर शोककळा पसरली आहे. घटनेची माहिती कळताच रिसोड पोलीस घटनास्थळी दाखल झाले आहेत. तर परिसरातील नागरिकांचीही गर्दी उसळली होती. मृतांच्या कुटुंबियांना आर्थिक मदत मिळावी, अशी मागणी गावकऱ्यांकडून केली जात आहे.