पोलीस नेहमीच्या ठिकाणी का नव्हते? नागपूर राड्यावरुन भाजप आमदाराचा संताप.

 नागपुरात दोन गटात वाद झाला, त्यातून पोलिसांवर दगडफेकही करण्यात आली. याबाबत आमदार प्रविण दटके यांनी ही घटना ठरवून घडवून आणण्यात आल्याचा आरोप केला आहे. नागपुरात सोमवारी रात्री दोन गटात तुफान राडा झाला. यावेळी दगडफेक आणि जाळपोळेचीही घटना घडली. त्यानंतर नागपुरात सध्या तणावपूर्ण शांतता पाहायला मिळत आहे. पोलिसांचा मोठा बंदोबस्त ठेवण्यात आला आहे. तर, पोलिसांकडून रात्रभर कोम्बिंग ऑपरेशन राबवण्यात आलं आहे. कोतवाली, गणेशपेठ, लकडगंज, पाचपावली, शांतीनगर, सक्करदरा,नंदनवन, इमामवाडा, यशोधरानगर आणि कपिलनगर भागात पोलिसांकडून संचारबंदी लागू करण्यात आली आहे. पोलिसांनी याप्रकरणी आतापर्यंत ८० जणांना ताब्यात घेतलं आहे.या घटनेबाबत भाजपचे आमदार प्रविण दटके यांनी नाराजी व्यक्त केली असून पोलिसांवर गंभीर आरोप केले आहेत. पोलिस वेळेत आले असते तर ही घटना टळू शकली असती असं ते म्हणाले.हे सगळं पूर्वनियोजित होतं. ज्या रस्त्यांवर दोन्ही समाजाच्या गाड्या राहतात त्या रस्त्यावर फक्त एकाच समाजाच्या गाड्या होत्या, दुसऱ्या समाजाच्या गाड्या पार्कही झाल्या नव्हत्या. सकाळी आंदोलन झालं होतं.

त्यानंतर दुपारी काही तरुणांनी आंदोलन केलं होतं. त्यांच्याशी चर्चा करुन प्रकरण मिटवण्यात आलं होतं. त्याबाबत मी स्वत: सीपींशी बोललो होतो. डीसीपी क्राइम यांच्याशीही बोललो. नियमाप्रमाणे कारवाई करण्याच्या सूचना मुख्यमंत्र्यांनी दिल्या होत्या.पण, जर नागपुरात कुठेही तणाव झाला तर नागपुरात अशी काही ठिकाणं आहेत जिथे सर्वात पहिले पोलिस पोहोचतात. तिथे काल पहिल्यांदा पोलिस नव्हते. जर घटनास्थळी पोलिस पहिले पोहोचले असते तर ही वाईट घटना घडली नसती.ही घटना घडतपर्यंत पोलिस पोहोचले नव्हते. जेव्हा पोलिस आले तोपर्यंत सर्व झालेलं होतं, मग पोलिस येतात. मी पहिल्यांदा असं वागताना बघतोय. तीन-तीन डीसीपी जखमी आहेत.

डीसपी अर्चित चांडक, डीसीपी निकेतन कदम, महिला डीसीपींनाही लागलंय, इतक्या वर्षात नागपुरात पहिल्यांदा हे घडलं आहे.ज्या ठिकाणी नेहमी पोलिस सर्वात पहिले उपस्थित असतात अशा ठिकाणी पोलिस न आल्याने हे सारं घडलं असा आरोप नागरिकांनी केला आहे. सीसीटीव्ही फोडले, तिसऱ्या मजल्यावरची काच फोडली आहे, दवाखान्यात घुसून त्यांच्या देवघरापासून सारं फोडलं आहे. हे सारं जाणूनबुजून केल्यासारखं दिसत आहे. दोन समाज येथे कित्येक वर्षांपासून राहत आहे.या भागातील पीआयची दोन्ही समाजांना एकत्रित ठेवण्याची भूमिका असली पाहिजे. ती काल संजय सिंग नावाच्या पीआयची नव्हती, असं इथले नागरिक सांगतात. जर, असं असेल तर पीआय संजय सिंग यांना तात्काळ निलंबित केलं पाहिजे, अशी मागणीही प्रवीण दटके यांनी केली आहे.