मुलांच्या शिक्षणासाठी दाम्पत्याचं मोठं पाऊल; फी भरण्यासाठी पैसे नसल्याने केली चोरी, नाशिकमधील प्रकार.

मुलाच्या ‘स्कूल फी’साठी असा मार्ग पत्करलेल्या इंदिरानगरातील ‘त्या’ दाम्पत्याला गुन्हे शाखा युनिट एकच्या पथकाने बेड्या ठोकल्या आहेत. पाच-सहा वर्षांपासून कौटुंबिक आर्थिक परिस्थिती सक्षम असल्याने मोठ्या हौशीने दाम्पत्याने पाल्याला एका मोठ्या इंग्रजी माध्यमाच्या शाळेत प्रवेश मिळवून दिला. नोकरदार वर्गातील या दाम्पत्याची काही महिन्यांपासून आर्थिक स्थिती बिघडली अन् मुलाच्या शाळेतील शैक्षणिक शुल्क भरण्याचा पेच समोर उभा ठाकला.त्यातच शैक्षणिक वर्षाचा अखेरचा महिना उजाडल्याने शालेय प्रशासनाने शुल्कासाठी तगादा लावला. विवंचनेत असलेल्या दाम्पत्याने उसनवारी पैसे घेण्याऐवजी एका दुकानातील गल्ल्यावर डल्ला मारून एक लाख रुपये लंपास केले. मुलाच्या ‘स्कूल फी’साठी चोरीचा मार्ग पत्करलेल्या इंदिरानगरातील ‘त्या’ दाम्पत्याला गुन्हे शाखा युनिट एकच्या पथकाने बेड्या ठोकल्या आहेत.

४ मार्च रोजी भद्रकाली पोलिसांच्या हद्दीत दहीपूल परिसरातील एका कपड्यांच्या दुकानात सायंकाळी पाच वाजता एक महिला व पुरुष साडी खरेदीच्या बहाण्याने आत शिरले. त्यांनी दुकानातील व्यक्तीला साडी दाखविण्यास सांगितले. विविध स्वरुपाच्या साड्या बघण्यात गुंतून राहिल्यानंतर आणखी काही साड्या दाखविण्याची त्यांनी विनंती केली. त्या साड्या काढण्यासाठी दुकानातील व्यक्ती पाठीमागे वळल्याचा गैरफायदा घेत संशयित पती-पत्नीने गल्ल्यातील एक लाख दहा हजार रुपये गायब करून पोबारा केला. त्यासंदर्भात भद्रकाली पोलिसांत अज्ञातांविरुद्ध गुन्हा नोंद असताना गुन्हे शाखा युनिट एकचे वरिष्ठ पोलिस निरीक्षक मधुकर कड यांनी सीसीटीव्ही तपासून चौकशीचे आदेश दिले. त्यानुसार अंमलदार प्रशांत मरकड व संदीप भांड यांनी तांत्रिक विश्लेषणासह गोपनीय पद्धतीने माहिती काढली.इंदिरानगर परिसरातील रथचक्र चौकाजवळील एका अपार्टमेंटमध्ये राहणाऱ्या दाम्पत्याला पथकाने ताब्यात घेतले. त्यावेळी चौकशीदरम्यान त्यांनी चोरलेली रक्कम बेडरूममधील कपाटातील लॉकरमध्ये ठेवल्याची माहिती दिली. पोलिसांनी पंचांसक्षम रक्कम ताब्यात घेतली.

पुढील तपास भद्रकाली पोलिस करीत आहेत. दरम्यान, यापूर्वी आर्थिक स्थिती मजबूत असल्याने दाम्पत्याने कॉलेजरोड परिसरातील एका इंग्रजी माध्यमाच्या शाळेत पाल्याचा प्रवेश केला होता. मात्र, हलाखीच्या स्थितीमुळे दोघांनीही चोरीचा मार्ग निवडल्याचे तपासात समोर आले.शिक्षणाचा अभाव, परिसरातील स्थिती, साथसंगतीमुळे गुन्हेगारीत अकडलेल्या संशयितांच्या कथा आतापर्यंत चर्चिल्या गेल्या आहेत. परंतु, नाशिक शहरात आता आर्थिक विवंचनेतून गुन्हेगारीत पाऊल टाकणाऱ्यांचेही प्रकरणे समोर येत आहेत. पाल्याच्या शाळेची फी भरण्यासाठी पैसे नसल्याने साडीच्या दुकानात चोरी करणाऱ्या दाम्पत्याला बेड्या ठोकल्यावर पोलिसांनाही धक्का बसला.दरम्यान, गत महिन्यात अमली पदार्थ विरोधी पथकाने (एनडीपीएस) मॅफेड्रॉन (एमडी) तस्करीत अटक केलेल्या मालेगावातील एका दाम्पत्याने आर्थिक संकटात सापडल्यावर सात अपत्यांचा सांभाळ करण्यासह संसार चालविण्यासाठी तस्करी सुरू केल्याची माहिती तपासात उघड झाली होती. त्यामुळे महिन्याभरात आर्थिक विवंचनेतून गुन्हेगारीत वळलेल्या दोन दाम्पत्यांची प्रकरणे उघड झाली आहेत. त्याप्रकरणी पोलिस पुढील तपास करीत आहेत.