Rajendra Nikam
नंदुरबार येथे भरधाव वेगात असलेल्या दोन दुचाकी एकमेकांवर आदळून भीषण अपघात झाला. या भीषण अपघातात दोघांचा मृत्यू झाला आहे, तर एक गंभीर जखमी झाला आहे.भरधाव दुचाकी समोरासमोर धडकल्याने दोन जागीच ठार तर एक जण गंभीर झाल्याची दुर्दैवी घटना नंदुरबार दोंडाईचा रस्त्यावर असलेल्या काठोबा चौकीजवळील मारुती मंदिराजवळ घडल्याची घटना १५ मार्च रोजी दुपारी घडली. याप्रकरणी तालुका पोलीस ठाण्यात धडक देणाऱ्या दुचाकीस्वाराविरुद्ध गुन्हा दाखल करण्यात आला आहे.नंदुरबार तालुक्यातील कोळदा येथे राहणारे दिलीप सुरेश ठाकरे (वय ४४) हे ट्रक चालक म्हणून कामाला होते. दरम्यान तो ट्रक नादुरुस्त असल्याने दुरुस्तीसाठी धुळे येथे गॅरेजमध्ये लावण्यात आला होता. ट्रकची पाहण्यासाठी धुळे येथे दुचाकीने (क्र.एम.एच.३९ ए.एम ६९४८) गेले होते. ते नंदुरबारकडे परतत होते.
यावेळी नंदुरबार-दोंडाईचा रस्त्यावरील काठोबा देवस्थानाजवळील मारुती मंदिराजवळ भरधाव वेगाने जाणाऱ्या दुचाकीस्वार कल्पेश शंकर ठाकरे (वय २६ ) रा. फत्तेपूर ता. शहादा याने त्याच्या ताब्यातील दुचाकी (क्र. एम.एच. १८ ए.पी ०८२४) रस्त्याच्या परिस्थितीकडे दुर्लक्ष करून चालविल्याने दिलीप ठाकरे यांच्या दुचाकीला भीषण धडक दिली.अपघातात दिलीप ठाकरे यांच्या डोक्याला गंभीर दुखापत झाल्याने त्यांचा मृत्यू झाला. तर कल्पेश ठाकरे याच्या पाठीमागे बसलेला सचिन शिवा पवार (वय २० ) रा. विरपूर ता. शहादा याचाही गंभीर जखमी झाल्याने मृत्यू झाल्याची घटना. अपघात झाल्यानंतर माहिती मिळताच नंदुरबार तालुका पोलीस ठाण्याचे पोलीस निरीक्षक सुनील भाबड, वाहतूक शाखेचे पोलीस निरीक्षक भरत जाधव, सहाय्यक पोलीस निरीक्षक जयसिंग परदेशी यांच्यासह पोलीस कर्मचाऱ्यांनी घटनास्थळी भेट दिली. यावेळी गंभीर जखमींना जिल्हा रूग्णालयात रवाना करण्यात आले. तेथील वैद्यकीय अधिकाऱ्यांनी तपासणी करून सचिन पवार व दिलीप ठाकरे यांना मयत घोषीत केले.
या अपघातात कल्पेश ठाकरे याला भीषण दुखापत झाल्याने त्याला सुरत येथे खाजगी रुग्णालयात हलविण्यात आले आहे. याप्रकरणी रणजित सुरेश ठाकरे यांच्या फिर्यादीवरुन नंदुरबार तालुका पोलीस ठाण्यात कल्पेश ठाकरे याच्याविरोधात गुन्हा दाखल करण्यात आला आहे. पुढील तपास सहाय्यक पोलीस निरीक्षक जयसिंग परदेशी करीत आहेत.
