नाशिक विभागात वर्षभरात ३१६ शेतकऱ्यांनी संपवलं जीवन; जळगाव जिल्ह्यात सर्वाधिक घटना, काय सांगते आकडेवारी.

नाशिक विभागात जानेवारी २०२४ ते जानेवारी २०२५ या तेरा महिन्यांच्या कालावधीत ३१६ शेतकरी आत्महत्येच्या घटना घडल्या.नाशिक विभागात जानेवारी २०२४ ते जानेवारी २०२५ या तेरा महिन्यांच्या कालावधीत ३१६ शेतकरी आत्महत्येच्या घटना घडल्या. त्यापैकी १८५ शेतकरी आत्महत्येच्या घटना एकट्या जळगाव जिल्ह्यात घडल्या आहेत. जळगाव जिल्ह्यात गेल्या वर्षात नाशिक विभागात सर्वात जास्त शेतकरी आत्महत्येच्या घटना घडल्याने या जिल्ह्यातील शेतकरी इतर जिल्ह्यांच्या तुलनेत जास्तच आर्थिक अडचणीत सापडल्याचे स्पष्ट होत आहे.शासन आणि प्रशासनाकडून शेतकऱ्यांसाठी विविध कल्याणकारी योजनांची अंमलबजावणी केली जाते. शेतकऱ्यांना नैसर्गिक आपत्तीच्या काळात शेतकऱ्यांच्या मदतीला शासन आणि प्रशासन नेहमीच धावून जाते.

असे असूनही नाशिक विभागात शेतकरी आत्महत्येच्या घटना सातत्याने घडत आहेत. शेतकरी आत्महत्येच्या वाढत्या घटनांमुळे विभागातील शेतकऱ्यांपुढील विविध अडचणी अद्यापही कमी जास्त प्रमाणात कायम असल्याचे उघड झाले आहे.प्रशासनाकडून शेतकऱ्यांचे मनोबल उंचावण्यासाठी अजूनही ठोस उपाययोजना करण्याची गरज या समस्येमुळे अधोरेखित झाली आहे. जळगाव जिल्ह्याच्या खालोखाल धुळे आणि अहिल्यानगर या दोन जिल्ह्यांत देखील शेतकरी आत्महत्येच्या घटना जास्त प्रमाणात घडलेल्या आहेत.

नापिकी, आर्थिक विवंचना, कर्जबाजारीपणा, शेतमालाला मिळणारा मातीमोल दर, नैसर्गिक आपत्ती, दुष्काळ अशा संकटांचा सामना विभागातील शेतकऱ्यांना करावा लागतो.नाशिक विभागात गेल्या तेरा महिन्यात ३१६ शेतकरी आत्महत्या झाल्या. त्यांपैकी जिल्हास्तरावरील समितीच्या चौकशीनंतर १२६ प्रकरणांतील प्रस्तावांना मंजुरी मिळून त्यांच्या कुटुंबीयांना शासकीय आर्थिक लाभ मिळाला. ७२ प्रस्ताव अपात्र ठरले असून, ११८ प्रस्ताव चौकशीच्या प्रक्रियेत आहेत.