मी कुठला पितोय, ५० च्या स्पीडने जात होतो, पण मध्येच… महिलेला उडवणाऱ्या तरुणाचा दावा, ‘अनदर राऊण्ड’ का म्हणाला?

 आमची कार दुचाकीच्या पुढे जाऊन उजवीकडे वळणार होती. इतक्यात रस्त्यावर एक खड्डा आला. यामुळे कारचा दुचाकीला स्पर्श झाला, ज्यामुळे एअरबॅग्ज उघडल्या आणि मला पुढचं काहीच दिसलं नाही.गुजरातच्या बडोदा शहरात मध्यरात्री (Vadodara Drink and Drive) एका बेफाम गाडी चालकाने पाच जणांना चिरडल्याची घटना घडली असून, यात महिला ठार झाली आहे. गुजरातच्या बडोदा शहरात विधी अभ्यासक्रम शिकत असलेल्या २० वर्षीय तरुणाने भरधाव गाडी चालवत दोन दुचाकींना धडक दिल्याची घटना गुरुवारी मध्यरात्री १२.३० च्या सुमारास घडली. यामध्ये एका महिलेचा जागीच मृत्यू झाला, तर चार जण जखमी झाले. हा तरुण दारू पिऊन गाडी चालवत असल्याचे त्याला पकडणाऱ्या प्रत्यक्षदर्शींनी पोलिसांना सांगितले, मात्र घटनेवेळी आपण मद्यप्राशन केले नव्हते, असा दावा त्याने केला आहे. यावेळी तो ‘अनदर राऊण्ड… अनदर राऊण्ड.. निकिता मेरी’ अशी असंबद्ध बडबडही करत होता.
रक्षित चौरसिया (Rakshit Chaurasia) असे या विद्यार्थ्याचे नाव असून, पोलिसांनी त्याला अटक केली आहे. तो मूळचा उत्तर प्रदेशातील वाराणसीचा रहिवासी आहे. येथे ‘पेइंग गेस्ट’ म्हणून राहतो, अशी माहिती पोलिस उपायुक्त पन्ना मोमाया यांनी दिली. हेमाली पटेल या महिलेचा या अपघातात मृत्यू झाला. ती दुचाकी चालवत असताना चौरसियाने तिला धडक दिली.

आरोपीने शनिवारी एएनआयशी बोलताना सांगितले की आमची कार दुचाकीच्या पुढे जाऊन उजवीकडे वळणार होती. इतक्यात रस्त्यावर एक खड्डा आला. यामुळे कारचा दुचाकीला स्पर्श झाला, ज्यामुळे एअरबॅग्ज उघडल्या आणि मला पुढचं काहीच दिसलं नाही. त्यामुळे गाडी अनियंत्रित झाली, असा दावा रक्षित चौरसियाने केला आहे.मी दारु प्यायल नव्हतो. ताशी ५० किमीच्या स्पीडने गाडी चालवत होतो. मी कुठलीही पार्टी केली नाही. आम्ही होलिका दहनाला गेलो होतो, असा दावाही रक्षितने केला. त्याने मयत महिलेच्या कुटुंबाला भेटण्याची विनंती केली. तसंच या अपघाताला आपण जबाबदार असल्याचेही म्हटले. त्यांची जी इच्छा असेल, ते मान्य करण्याची तयारीही रक्षितने दर्शवली.रक्षित चौरसिया चालवत असलेली गाडी त्याचा मित्र मित चौहान याच्या मालकीची होती. अपघातावेळी तोसुद्धा गाडीत होता. मात्र, नंतर तो फरार झाला. पोलिस त्याचा शोध घेत आहेत. त्याने पळताना रक्षितवरच आरोप केला आणि तो फरारी झाला.प्रत्यक्षदर्शींनी चित्रीत केलेल्या व्हिडिओमध्ये चौहान गाडीतून बाहेर पडून या अपघातासाठी चौरसियाला दोष देत असल्याचे, तर चौरसिया जोरजोरात ओरडत असल्याचे दिसत आहे. ‘ओम नम: शिवाय’ असेही तो ओरडत होता. त्यानंतर उपस्थितांनी चौरसियाला मारहाण करून नंतर पोलिसांच्या स्वाधीन केल्याचेही या व्हिडिओमध्ये दिसते.प्रसारमाध्यमांच्या हाती लागलेल्या सीसीटीव्ही फूटेजमध्ये भरधाव कार दोन दुचाकींना धडकल्याने त्यावरील प्रवासी खाली पडले. नंतर कारने त्यांना फरफटत नेल्याचे दिसत आहे. ‘गाडीचा वेग अधिक होता. चौरसिया दारू पिऊन गाडी चालवत होता, की नाही, हे पाहण्यासाठी त्याची वैद्यकीय चाचणी केली जाईल,’ असे मोमाया यांनी नमूद केले.