रेल्वे अपहरणामागे अफगाण; पाकिस्तानचा आरोप, हल्लेखोर सूत्रधारांशी संपर्कात असल्याचा दावा.

दहशदवाद्यांनी बोलान जिल्ह्यात जाफर एक्स्प्रेसवर केलेल्या हल्ल्यामागे अफगाणिस्तानातील तालिबानी राजवटीचा हात असल्याचा आरोप पाकिस्तानने केला आहे.बलोच लिबरेशन आर्मीच्या (बीएलए) दहशदवाद्यांनी बोलान जिल्ह्यात जाफर एक्स्प्रेसवर केलेल्या हल्ल्यामागे अफगाणिस्तानातील तालिबानी राजवटीचा हात असल्याचा आरोप पाकिस्तानने केला आहे. अफगाण तालिबान सरकारने पाकिस्तानाचे आरोप फेटाळून लावले आहेत. याआधी या घटनेमागे भारताचा हात असल्याचा आरोप पाकिस्तानने केला होता. जाफर एक्स्प्रेस प्रकरणातील हल्लेखोर अफगाणिस्तानातील सूत्रधारांशी थेट संपर्कात असल्याचा दावा पाकिस्तानने केला आहे. पाकिस्तानी परराष्ट्र मंत्रालयाचे प्रवक्ते शफकत अली खान यांनी हल्लेखोर आणि अफगाणिस्तानातील सूत्रधारांचे दूरध्वनी संभाषण उघड झाल्याचे सांगितले. ‘दहशतवाद्यांना अफगाणिस्तानात आश्रय दिला जात आहे. बीएलएसारख्या दहशतवादी संघटनांना अफगाण भूमीचा वापर दहशतवादी कारवायांपासून करण्यास रोखावे, असे पाकिस्तान अफगाणिस्तानातील अंतरिम सरकारला सातत्याने सांगत आला आहे,’ असे खान म्हणाले.

दरम्यान, अफगाण तालिबान सरकारने पाकिस्तानचा आरोप फेटाळला आहे. ‘पाकिस्तानचे आरोप बिनबुडाचे आहेत. पाकिस्तानने तथ्यहीन आरोप करण्याऐवजी सुरक्षेवर लक्ष द्यावे,’ अफगाणिस्तानच्या परराष्ट्र परराष्ट्र मंत्रालयाच्या प्रवक्ते अब्दुल काहर बलखी यांनी ‘एक्स’वर म्हटले आहे.पाकिस्तानच्या खैबर पख्तुनख्वा प्रांतातील मशिदीत झालेल्या आत्मघातकी स्फोटात चार जण जखमी झाले. दक्षिण वजिरिस्तान येथील मौलाना अब्दुल अजिज मशिदीत हा स्फोट झाले. यामध्ये जमात उलेमा-ए-इस्लामचे जिल्हाप्रमुख मौलाना अब्दुला नदीम यांच्यासह इतर जखमी झाले.क्वेट्टा (बलुचिस्तान) : पाकिस्तानचे पंतप्रधान शाहबाज शरीफ यांनी राष्ट्रीय एकतेचे आवाहन केले असून, देशातील दहशतवादाविरोधात चर्चेचे आवाहनही केले आहे. बलुचिस्तानातील जाफर एक्स्प्रेस अपहरणाच्या घटनेनंतर शरीफ यांनी वरील आवाहन केले आहे.

‘पाकिस्तानातील सर्व राजकीय नेतृत्वाने लष्करी नेतृत्वासोबत एकत्र बसून, देशाला भेडसावणाऱ्या आव्हानांवर चर्चा केली पाहिजे,’ असे शरीफ यांनी म्हटले आहे. दरम्यान, रेल्वे प्रवाशांच्या सुटकेदरम्यान ठार झालेल्या २६ ओलिसांपैकी १८ सैनिक असल्याचे लष्कराने म्हटले आहे. बलुचिस्तानात रेल्वेवरील हल्ल्याच्या पार्श्वभूमीवर पाकिस्तानने भारताचा दहशतवादी कारवायांना पाठिंबा असल्याचा आरोप गुरुवारी केला होता. भारताने तीव्र शब्दांत पाकिस्तानाच आरोप फेटाळला असून, पाकिस्तान जागतिक दहशतवादाचे केंद्र असल्याचा पुनरुच्चार केला आहे. परराष्ट्र मंत्रालयाचे प्रवक्ते रणधीर जैस्वाल म्हणाले, ‘जागतिक दहशतवादाचे केंद्र कुठे आहे, हे संपूर्ण जगाला माहिती आहे. इतरांकडे बोटे दाखवण्यापेक्षा पाकिस्तानने आपल्या आत पाहावे आणि आपले अंतर्गत प्रश्न आणि अपयशाबद्दल इतरांवर आरोप करणे थांबवावे.’