Rajendra Nikam
डोंबिवलीत होळी सण साजरा करताना फुगा लागल्याच्या कारणाने एका तरुणाने एका अल्पवयीन मुलाला जाब विचारत त्याच्यावर धारदार हत्याराने हल्ला केल्याचा प्रकार घडला आहे.डोंबिवलीपूर्वेतील मानपाडा रोडला असलेल्या सांगावात होळी खेळताना रंगाचा बेरंग झाल्याची घटना घडली. यशवंत काॅम्पलेक्स भागात गुरुवारी रात्री साडेआठच्या सुमारास सोसायटी आणि परिसरातील मुले रंगीत पाण्याने भरलेले फुगे एकमेकांवर फेकून होळीचा आनंद घेत होती. रंगाचे फुगे एकमेकांवर फेकले जात असताना एक फुगा तेथेच उभ्या असलेल्या तरूणाच्या अंगावर पडला. त्यामुळे संतप्त झालेल्या एका तरूणाने फुगा फेकणाऱ्या अल्पवयीन तरूणाला जाब विचारत मारहाण तर केलीच, शिवाय अंधारात नेऊन त्याच्यावर धारदार हत्याराने हल्ला केला.
या हल्ल्यात हर्ष शिवाजी कांबळे (१७) हा जखमी झाला असून त्याच्या जबानीवरून मानपाडा पोलिसांनी हल्लेखोर प्रणय जाधव (रा. यशवंत कॉम्प्लेक्स, सांगाव) याच्या विरोधात गुन्हा दाखल केला आहे. हर्ष कांबळे हा मानपाडा रोडला असलेल्या शंकेश्वर शाळेजवळील साई विधी सोसायटीत कुटुंबासह राहतो. तर हल्लेखोर प्रणय जाधव हा तेथेच असलेल्या यशवंत काॅम्पलेक्समध्ये राहतो.या संदर्भात पोलिस सूत्रांकडून मिळालेल्या माहितीनुसार, गुरूवारी रात्री साडेआठच्या सुमारास यशवंत काॅम्पलेक्स परिसरात होळी पौर्णिमेनिमित्त हर्ष आणि त्याचे मित्र रंगाचे फुगे एकमेकांवर फेकून होळीचा आनंद घेत मौजमज्जा करत होते. त्यावेळी यशवंत काॅम्पलेक्समधील प्रणय हा मौजमजेत सहभागी न होता तो दूरवर उभा होता. रंगाचे फुगे एकमेकांंवर फेकत असतानाच त्यातील एक फुगा हर्षकडून चुकून प्रणयच्या अंगावर जाऊन पडला.
