Rajendra Nikam
नाशिकमध्ये एक मन हेलावून टाकणारी घटना घडली आहे. घरातील २ वर्षांचा मुलगा रात्रीचे जेवण झाल्यावर आजी-आजोबासमोरच निपचित पडून राहिला. नेमकं काय घडलं जाणून घ्या.नाशिकमधून एक धक्कादायक घटना समोर आली आहे. आपल्या धिंगाण्याने घर डोक्यावर उचलून घेणारा चिमुकला निपचित पडल्याने सर्वांनाच धक्का बसला. आदित्य शिंदे असं चिमुकल्याचं नाव असून त्याच्या जाण्याने सर्वांवर दु:खाचा डोंगर कोसळला आहे. रात्री जेवणानंतर आई-वडील आणि आजी यांच्यासमोर घरातच खेळणाऱ्या दोन वर्षीय बालकाने जवळच पडलेल्या बाटलीतील डास मारण्याचे औषध प्यायल्याने उपचारांदरम्यान त्याचा मृत्यू झाल्याची दुर्दैवी घटना शहरात घडली. पालकांच्या निष्काळजीपणामुळे महिनाभरात तिसऱ्या बालकाचा मृत्यू झाल्यामुळे शहरवासीयांत हळहळ व्यक्त होत आहे.
म्हसरूळ पोलिसांनी दिलेल्या माहितीनुसार, आदित्य नवनाथ शिंदे (वय २ वर्षे, रा. शिंदे वस्ती, दिंडोरी रोड) असे मृत बालकाचे नाव आहे. सोमवारी (दि. १० मार्च) रात्री घरात खेळणाऱ्या आदित्यने रांगताना पालकांची नजर चुकवून डास मारण्याच्या ‘मॉस्किटो रीपिलन्ट रीफिल’च्या बाटलीचे झाकण घडून त्यातील विषारी औषध सेवन केले. त्यानंतर काही वेळात त्याला अस्वस्थ वाटण्यास सुरुवात होऊन तो बेशुद्ध पडल्याने पालकांच्या लक्षात ही बाब आली. त्यांनी तातडीने रात्री साडेअकराच्या सुमारास आदित्यला आडगावच्या वैद्यकीय महाविद्यालयात दाखल केले. मात्र, तेथे उपचारांदरम्यान मंगळवारी (दि. ११) आदित्यचा मृत्यू झाल्याचे वैद्यकीय अधिकाऱ्यांनी स्पष्ट केले. म्हसरूळ पोलिसांनी या प्रकरणी अकस्मात मृत्यूची नोंद करून पुढील तपासास प्रारंभ केला आहे.शहरात महिनाभरात तीन बालकांचा पालकांच्या निष्काळजीपणामुळे मृत्यू झाल्याची नोंद पोलिसांत आहे. जेलरोड येथील कॅनॉल रोड परिसरात चहा बनविणाऱ्या आईच्या कडेवर खेळणाऱ्या बालकाच्या अंगावर उकळता चहा सांडला. त्यामुळे गंभीररीत्या भाजलेल्या दीडवर्षीय ओरान मुसा शेख याचा मृत्यू झाला. दुसऱ्या घटनेत पाणी साठवणाच्या छोट्या हौदात पडून प्रांजल लहू माने (रा. विजयनगर, जेलरोड) या दोनवर्षीय बालकाचा मृत्यू झाला होता. आता विषारी औषध प्यायल्याने आदित्यचा मृत्यू झाला आहे. या घटनांमुळे शहरात हळहळ व्यक्त होत असून, पालकांनी बालकांकडे अधिक सजगतेने लक्ष देण्याची अपेक्षा सुजाण नागरिकांसह आरोग्य व पोलिस यंत्रणा व्यक्त करीत आहे.
%20गांधी%20यांचे%20निधन.){kind=link}
