‘खोक्या’च्या नावाने पाथर्डीत एक कोटीची खंडणी, सतीश भोसलेचे पाय खोलात?

बीड जिल्ह्यातील सतीश भोसले उर्फ ‘खोक्या’ याच्या नावाने पाथर्डीत एक कोटी रुपयांची खंडणी मागण्यात आली आहे. खेडकर यांनी २३ गुंठे जमिनीच्या ताब्यासाठी खंडणीची फिर्याद दिली आहे. याप्रकरणी पोलिसांनी आठ जणांविरुद्ध गुन्हा दाखल केला आहे.बीड जिल्ह्यातील सतीश भोसले उर्फ ‘खोक्या’ याच्या नावाने पाथर्डीतही एक कोटी रुपयांची खंडणी मागण्यात आल्याचे उघड झाले आहे. तेथील २३ गुंठे जमिनीवर ताबा मिळविण्यासाठी एक कोटी रुपयांची खंडणी मागण्यात आल्याची फिर्याद आजिनाथ सावळेराम खेडकर (वय ४७ रा. चिंचपूर इजदे, ता. पाथर्डी) यांनी दिली आहे. त्यानुसार पोलिसांनी सहा महिलांसह आठ जणांविरुद्ध गुन्हा दाखल केला आहे.
प्रशांत अरफान चव्हाण ऊर्फ गब्या, शिल्पा प्रशांत चव्हाण, सुनीता संजय भोसले, इंदुबाई चव्हाण, शिल्पा अमोल काळे, संतोष चव्हाण, काजल काळे, अनिता काळे (सर्व रा. निपानी जळगाव, ता. पाथर्डी) यांच्याविरुद्ध गुन्हा दाखल करण्यात आला आहे. खेडकर यांनी एक जानेवारी २०२५ रोजी विष्णू ढाकणे यांची २३ गुंठेे जमीन खरेदी केली होती. जागेचा ताबा घेण्यासाठी खेडकर तेथे गेले.

त्या वेळी आरोपी आडवे आले. त्यातील प्रशांत चव्हाण याने आपण सतीश उर्फ खोक्या भोसले याचा साडू असून, जमिनीचा ताबा हवा असेल तर एक कोटी रुपये द्यावे लागतील, अशी धमकी दिली.सध्या बीडचा खोक्या हा तूफान चर्चेत असून त्याच्या विरोधात गुन्हा दाखल झालाय. पोलिस त्याच्या शोधात असून त्याची गाडी जप्त करण्यात आलीये. सतीश भोसले ऊर्फ खोक्या याच्यावर सातत्याने गंभीर आरोप केली जात आहेत. खोक्यामुळे आमदार सुरेश धस हे सध्या चांगलेच अडचणीत सापडल्याचे बघायला मिळतंय. खोक्या हा अनेक चुकीची कामे करत होता. २०० हरण्यांची शिकार त्याने केल्याचा आरोप आहे.हेच नाही तर खोक्याच्या घरातून हरण्याला पकडण्याची जाळी आणि इतरही काही वस्तू या वनविभागाने जप्त केल्या आहेत. खोक्या हा एका कुटुंबातील दोन सदस्यांना अत्यंत क्रूरपणे मारहाण करत होता. त्याचाच व्हिडीओ हा सोशल मीडियावर व्हायरल झाला. मात्र, हा खोक्या स्वत: सामाजिक कार्यकर्ता असल्याचे म्हणताना दिसतोय. खोक्या एका व्हिडीओमध्ये तर चक्क पैशांचा पाऊस पाडताना दिसला. सुरेश धस यांनी अगोदरच मान्य केले की, खोक्याला मी ओळखतो.