पाकिस्तानात ट्रेन हायजॅक; बलुच बंडखोरांकडून ४५० प्रवासी ओलिस, ६ सैनिकांची हत्या.

पाकिस्तानात दहशतवाद्यांनी ट्रेन हायजॅक केल्याचा दावा केला आहे. बलुच लिबरेशन आर्मी नावाच्या संघटनेनं बोलन प्रांतात जाफर एक्स्प्रेस हायजॅक केल्याचा दावा केला.पाकिस्तानात दहशतवाद्यांनी ट्रेन हायजॅक केल्याचा दावा केला आहे. बलुच लिबरेशन आर्मी (Baloch Liberation Army) नावाच्या संघटनेनं बोलन प्रांतात जाफर एक्स्प्रेस (Jaffar Express) हायजॅक केल्याचा दावा केला. एक्स्प्रेसमधील ४५० प्रवाशांना ओलीस ठेवण्यात आलं आहे. आमच्याविरोधात लष्करी कारवाई केल्यास सगळ्या प्रवाशांना ठार करु, अशी धमकी बलुच लिबरेशन आर्मीकडून देण्यात आली आहे. पाकिस्तानी माध्यमांनी दिलेल्या माहितीनुसार ट्रेनमध्ये ४५० प्रवासी आहेत. यामुळे पाकिस्तानात मोठी खळबळ उडाली आहे.बलुच लिबरेशन आर्मीच्या दहशतवाद्यांनी हायजॅक केलेल्या ट्रेनमध्ये पाकिस्तानी लष्कर, पोलीस, दहशतवाद विरोधी दल आणि इंटर सर्व्हिसेस इंटेलिजन्सचे कर्तव्यावर असलेले कर्मचारी आहेत. हे सगळे सुट्टीसाठी पंजाबला जात होते.

ट्रेनमधील सैनिकांनी कोणत्याही प्रकारची कारवाई करण्याचा प्रयत्न केल्यास सगळ्या ओलिसांना मारुन टाकू, अशी थेट धमकी बलुच लिबरेशन आर्मीकडून देण्यात आलेली आहे. दहशतवाद्यांनी पाकिस्तानी लष्कराच्या ६ सैनिकांची हत्या केली आहे. बलुच लिबरेशन आर्मीच्या दहशतवाद्यांनी महिला, लहान मुलांसह बलुच प्रवाशांची सुटका केली आहे. बलुच लिबरेशन आर्मीचा फिदायीन तुकडी, मजीद ब्रिगेड या संपूर्ण कारवाईचं नेतृत्त्व करत आहे. या सगळ्या कारवाईत फतेह स्क्वॉड, एसटीओएस आणि गोपनीय शाखेचाही सहभाग आहे.बलुच समूहांनी काही दिवसांपूर्वीच पाकिस्तान आणि चीनविरोधात एका नव्या हल्ल्याची घोषणा केली होती. बलुच समूहांनी नुकताच सिंधी फुटिरतावादी समूहांसोबत युद्धाभ्यास पूर्ण केला आहे. बलुच राजी अजाओई संगरनं याबद्दल एक संयुक्त प्रेस रिलीज जारी केलं होतं. त्यातून एका निर्णायक युद्ध रणनीतीची घोषणा करण्यात आली होती.बलुच राजी अजाओई संगरमुळे पाकिस्तानातील चीनकडून संचालित केल्या जाणाऱ्या अनेक सीपीईसी प्रकल्पांना मोठा धोका निर्माण झाला आहे. बलुच राजी अजाओई संगरची एक संयुक्त बैठक नुकतीच झाली. त्यानंतर एक निवेदन जारी करण्यात आलं. या बैठकीत सहयोगी बलुच लिबरेशन आर्मी, बलुचिस्तान लिबरेशन फ्रंट, बलुच रिपब्लिकन गार्ड्स, सिंधी लिबरेशन ऑर्गनायझेशन सिंधू देश रिव्हॉल्युशनरी आर्मीच्या उच्चस्तरीय शिष्टमंडळानं सहभाग घेतला होता.