वडिलांनाच जबर मारहाण अन् आकस्मिक मृत्यू भासवला, पोटच्या मुलाचे कृत्य; कारण काय?

 शिर्डीत घरगुती वादातून पोटच्या मुलानेच वडिलांना संपवल्याची धक्कादायक घटना घडली आहे. या घटनेने शिर्डी पुन्हा हादरली आहे. मुलाने केलेल्या जबर मारहाणीमुळे वडिलांना जीव गमवावा लागला आहे.शिर्डीत घरगुती वादातून पोटच्या मुलानेच वडिलांना संपवल्याची धक्कादायक घटना घडली आहे. या घटनेने शिर्डी पुन्हा हादरली आहे. घरगुती वादातून मुलाकडून वडिलांना पाईपने जबर मारहाण करण्यात आली. यामुळे त्यांचा मृत्यू झाला आहे. त्यांना मारहाण झाल्याचे शवविच्छेदन अहवालातून स्पष्ट झाले आहे. यामध्ये शिर्डी पोलिसांनी स्वत:च तक्रारदार होऊन कायदेशीर कारवाई करत आहेत. आरोपी मुलगा शुभम दत्तात्रय गोंदकर याच्यावर हत्येचा गुन्हा दाखल केला असून पोलिसांनी त्याला ताब्यात घेतले आहे.वृत्तानुसार, ६ मार्चच्या घडलेल्या या घटनेचा पाच दिवसांनंतर उलगडा झाला आहे. सुरुवातीला दत्तात्रय गोंदकर यांचा आकस्मिक मृत्यू असल्याचे भासवण्यात आले.

मात्र शवविच्छेदन अहवालातून जबर मारहाणीमुळे मृत्यू झाल्याचे सत्य समोर आले. शिर्डीतील प्रतिष्ठित कुटुंबात घरगुती वादातून ही हत्या झाल्याचे समोर येतेय. याप्रकरणी शिर्डी पोलीस ठाण्याचे पोलीस उपनिरीक्षक निवांत जगजितसिंह जाधव यांनी तक्रार दिली आहे.तक्रारीत असे नमूद करण्यात आले की, दत्तात्रय शंकरराव गोंदकर वय ५४ वर्षे रा.हॉटेल साई, नाला रोड, शिर्डी यांचा राहत्या घरात मृतदेह आढळून आला. यानंतर पोलिसांनी मयत व्यक्तीचा पंचनामा देखील केला आणि मृतदेह पोस्टमॉर्टमसाठी रवाना केला. ७ मार्चला लोणी येथे पोस्टमॉर्टम करण्यात आले. याप्रकरणी दत्तात्रय यांच्या पत्नी संजीवनी दत्तात्रय गोंदकर तसेच त्यांचे पुतणे व चुलत भाऊ यांच्याकडे चौकशी करण्यात आली. १० मार्चला पोस्टमॉर्टम रिपोर्ट हाती आला. दत्तात्रय यांच्या तिन्ही बहिणींना चौकशीसाठी बोलवण्यात आले. त्यांनीही त्यांना मारहाण झाल्याचा संशय व्यक्त केला.शुभम गोंदकर याच्यावर पोलिसांना संशय होता. त्याच्याकडे कसून चौकशी केली असता ६ मार्चला आईशी झटापट झाल्याने त्याला राग अनावर झाला होता. त्यामुळे मी मारहाण केल्याचे त्याने कबुल केले आहे. त्याच्याविरुद्ध भारतीय न्याय संहिता विविध कलमान्वये गुन्हा दाखल करण्यात आला असून अटक करण्यात आली आहे. घटनेचा पुढील तपास शिर्डी पोलीस करीत आहे.