परतूरच्या तहसीलदारांवर हल्ला, जालना जिल्ह्यात अधिकाऱ्यांवर हल्ले सुरूच.

आमदार बबनराव लोणीकर यांनी विधिमंडळात वाळू उत्खनन व माफीयांकडून होणाऱ्या सशस्त्र हल्ल्याचा मुद्दा उपस्थित केला आहे. तहसीलदार प्रतिभा गोरे यांच्यावर हल्ला करण्यात आलाय. या घटनेने मोठी खळबळ झाल्याचे बघायला मिळतंय. गुरुवारी मध्यरात्री हा हल्ला करण्यात आला.विधिमंडळात आमदार बबनराव लोणीकर यांनी अवैध खनिज वाळू उत्खनन व माफीयांकडून होत असलेल्या सशस्त्र हल्ल्याचा विषय मांडला. हजारो हायवा आणि जेसीबीच्या साह्याने दिवसरात्र चोरी होत असून महसूल पथकावर सशस्त्र हल्ल्याची तक्रार त्यांनी केली. जिल्हाधिकारी डॉ. श्रीकृष्ण पांचाळ यांना महसूल विभाग संघटनेचे अध्यक्ष अंबड तहसीलदार विजय चव्हाण, अपर जिल्हाधिकारी रिता मैत्रवार, तहसीलदार प्रतिभा गोरे यांच्यासह सर्व तलाठी, मंडळ अधिकाऱ्यांनी निवेदन देऊन वाळू माफियांवर कठोर तडीपार कारवाई करण्यात यावी अशी मागणी केली आहे.

परतूर शहराजवळ अंबा रोडवरील इंदिरानगर भागात अवैध गौण खनिज उत्खनन करणाऱ्यांवर छापा मारण्यास गेलेल्या परतूरच्या तहसीलदार प्रतिभा गोरे यांच्यावर गुरुवारी मध्यरात्री हल्ला करण्यात आला. त्यांनी परतूर पोलिस ठाण्यात दिलेल्या तक्रारीवरून इलियास कुरेशी, अमजद कुरेशी, इरफान युनू शेख, जुनेद, आणि इतर सात आठ जणांवर गुन्हा दाखल करण्यात आला आहे. या प्रकरणी अमजद खाजा कुरेशी (वय ३४, रा. कुरेशी मोहला, परतूर), सुजाहिद मतीन खतीब (वय १८, रा. इंदिरानगर), एजाज कादर खान (वय ४५, रा. आंबा रोड, परतूर) यांना अटक करण्यात आली आहे.तहसीलदार गोरे गुरुवारी मध्यरात्रीनंतर त्यांच्या खाजगी वाहनातून फिरत असताना त्यांना जेसीबीच्या साह्याने अवैध खनिज उत्खनन करून हायवात भरत असलेले दिसले. त्यांनी चौकशी करण्यास सुरुवात करताच जेसीबी व हायवा पळून गेले. गोरे यांनी त्यांचा पाठलाग केला.

पारडगाव शिवारात अचानक सहा ते सात वाळू माफिया गोरे यांच्या अंगावर धावून आले. त्यांना शिवीगाळ व धक्काबुक्की केली. गोरे जमिनीवर पडल्या. त्यांच्या हातातील मोबाइल अखिल बिल्डर याने हिसकावून घेतला आणि जेसीबी व हायवा घेऊन ती टोळी पसार झाली.जालना जिल्ह्यात अधिकाऱ्यांवर हल्ले सुरूच आहेत. अतिरिक्त जिल्हाधिकारी रिता मैत्रवार यांच्यासह अंबड, घनसावंगी, परतूर, मंठा, जाफराबाद, जालना या सर्व तालुक्यातील तहसीलदार, अनेक मंडल अधिकारी व तलाठ्यांवर गेल्या वर्षभरात अनेक जीवघेणे हल्ले झाले आहेत. वाळू माफियांच्या परस्पर टोळी युद्धात खून मारामाऱ्या होत आहेत. अनेक मंडल अधिकारी व तलाठ्यांनी जिल्हाधिकाऱ्यांकडे पिस्तूल परवाना देण्यासाठी अधिकृत अर्ज प्रस्ताव दाखल केले आहेत. वाळू चोरी त्यातून गुन्हेगारी सामाजिक तणाव यामुळे महसूल व पोलिस प्रशासन हतबल आहे.