चड्डी-बनियान घातलेले तिघे घरात घुसले अन् दगड-काठ्यांनी मारहाण, एकाचा मृत्यू, पुण्यात दहशत.

पुण्याजवळील दौंडमध्ये तिघे चड्डी-बनियान घातलेले एका घरात घुसले आणि त्यांनी दगड आणि काठ्यांनी कुटुंबाला मारहाण केली. यामध्ये एकाचा मृत्यू झाला आहे. या घटनेमुळे परिसरात एकच दहशत माजली आहे.पुण्याजवळील दौंड तालुक्यातील यवत रेल्वे स्टेशन जवळ एका घरात बुधवारी (०५ मार्च) रात्रीच्या साडेदहा अकराच्या दरम्यान चड्डी आणि बनियान घातलेले तिघेजण घुसले. त्यांनी घरातील पाच व्यक्तींना दगड आणि काठ्यांनी बेदम मारहाण केली. या भयंकर घटनेत एका व्यक्तीचा मृत्यू झाला आहे. तर, एकजण अती गंभीर झाल्याची माहिती आहे. या घटनेत इतर तीनजण किरकोळ जखमी झाले आहेत. या घटनेने परिसरात एकच खळबळ उडाली असून, जुन्या वादातून हा प्रकार घडला की चोरीचा प्रकार होता याची चर्चा सध्या सुरू आहे.दरम्यान, या प्रकरणात यवत पोलिसांनी दोन संशयित नातेवाईकांनाही ताब्यात घेतल्याची माहिती आहे. त्यामुळे हा प्रकार चोरीचा की जुन्या वादाचा याविषयी वेगवेगळे तर्कवितर्क लढवले जात आहेत.

याप्रकरणी यवत पोलिसांनी दिलेल्या प्राथमिक माहितीनुसार, यवत रेल्वे स्टेशन येथील निलकंठेश्वर मंदिराजवळ शेतात शशिकांत चव्हाण यांचे घर आहे. बुधवारी (०५ मार्च) रात्री पावणे अकराच्या आसपास तीन अज्ञात चड्डी- बनियन घातलेल्या व्यक्ती शशिकांत चव्हाण यांच्या घरात घुसले. त्यांनी थेट दगड, काठ्यांनी घरात असलेल्या व्यक्तींना बेदम मारहाण करण्यास सुरुवात केली. ही मारहाण एवढी क्रूर आणि बेदम होती की, अविनाश शशिकांत चव्हाण या ३४ वर्षीय व्यक्तीचा यात मृत्यू झाला. यावेळी घरात पाच लोक होते. त्यापैकी चार जण गंभीर जखमी झाले आहेत. यातील एक जण अत्यवस्थ आहे. त्याच्यावर लोणी काळभोर येथील खाजगी रुग्णालयात उपचार सुरू असून उर्वरित तीन जणांना रुग्णालयात दाखल केले असून, अतिदक्षता विभागात उपचार सुरू आहेत.हा नेमका जुना वाद आहे की, चोरीचा उद्देशाने हा हल्ला करण्यात आला. याचा तपास पोलीस करत असून चव्हाण कुटुंबाचा त्यांच्याशी वाद होता, त्या दोन संशयित नातेवाईकांनाही पोलिसांनी ताब्यात घेतले आहे. दरम्यान, पुणे येथील ठसे तज्ज्ञ आणि श्वानपथक घटना स्थळी दाखल झाले होते, त्यांनीही पाहणी केली. सध्या या प्रकरणाचा तपास सुरु आहे.