ताम्हिणी घाटात भीषण अपघात झाला आहे. कार थेट एसटीमध्ये घुसली आणि यात दोघांचा जागीच मृत्यू झाला.

ताम्हिणी घाटात भीषण अपघात झाला आहे. कार थेट एसटीमध्ये घुसली आणि यात दोघांचा जागीच मृत्यू झाला. ताम्हिणी घाटात रायगड जिल्ह्याच्या हद्दीत रेस्ट हाऊसच्या अलीकडे मंगळवारी, ४ मार्च रोजी दुपारी भीषण अपघात झाला. दुपारी एक ते दीड वाजताच्या सुमारास एसटी बस आणि स्विफ्ट कारचा भीषण अपघात झाला. या अपघातात कारमधील दोघांचा जागीच मृत्यू झाला असून तिघेजण जखमी झाले आहेत.याबाबत सविस्तर माहिती अशी, की खेड – चिंचवड ही एसटी बस पुण्याच्या दिशेकडे जात होती. तर स्विफ्ट कार विळे गावाच्या दिशेकडे येत होती. उतार आणि वेग असल्यामुळे तसंच गाडीवरील ताबा सुटल्याने स्विफ्ट कार एसटी बसला समोर जाऊन धडकली. ही धडक एवढी जोरदार होती की यामध्ये स्विफ्टच्या चालकाच्या बाजूचा भाग बसमध्ये शिरून पूर्ण चेपला गेला आहे.

त्यामुळे कार चालक आणि चालकाच्या पाठीमागे बसलेली जेष्ठ महिला यांचा मृत्यू झाला. तसंच हे दोन्ही मृतदेह कारमध्येच अडकून पडले.सह्याद्री वन्यजीव रक्षणार्थ सामाजिक संस्थेचे सदस्य घटनास्थळी जाऊन त्यांनी आधुनिक साधनांच्या मदतीने दुपारी ३ वाजता अडकलेले मृतदेह बाहेर काढण्याचं काम सुरु केलं. कार मधील तीन जखमींना माणगाव येथील उपजिल्हा रुग्णालयात उपचारासाठी हलवण्यात आलं आहे. जखमींमध्ये एका लहान मुलीचा देखील समावेश आहे. तर एसटीमधील कोणीही जखमी झाले नाही.

अपघात झालेल्या कार मधील प्रवासी मुळशी तालुक्यातील शिंदेवाडी येथील असल्याची माहिती समोर आली आहे. त्यांची नावं अद्याप समोर आली नाहीत. मात्र ते मुळचे उडीसा राज्यातील असल्याची माहिती समोर आली आहे.अपघाताची माहिती मिळताच विळे दूरक्षेत्र पोलीस ठाण्याचे पोलीस उपनिरीक्षक राठोड आणि पोलीस विनोद तांदळे घटनास्थळी पोहोचले. तसंच येथील तुषार कदम आणि राकेश दगडे यांनी देखील घटनास्थळी जाऊन मदतकार्य सुरू केलं. माणगाव पोलीस स्थानकाचे पोलीस निरीक्षक निवृत्ती बोऱ्हाडे आणि पोलीस कर्मचारी हे देखील रेस्क्यू टीम सोबत घटनास्थळी पोहचलं.