अकोल्यातील बड्या नेत्याच्या नातीचं अपहरण, शाळेतून घरी आलीच नाही; परिसरात खळबळ.

अकोल्यातील बड्या नेत्याच्या नातीचं अपहरण झालं असून याप्रकरणी पोलिसात तक्रार दाखल करण्यात आली आहे. पोलिसांनी पथकं तयार करुन मुलीचा शोध सुरू केला आहे.अकोल्यात माजी महिला नेत्याच्या नातीचं अपहरण झाल्याची माहिती समोर आली आहे. त्यांची नात इयत्ता सहावीमध्ये शिकते आहे. शहरातील कृषीनगर भागातल्या एका नामांकित इंग्लिश स्कूल परिसरातून यांच्या १२ वर्षीय नातीचं अपहरण झालं आहे.मुलीच्या अपहरण प्रकरणात अकोल्यातील सिव्हिल लाईन पोलीस ठाण्यात गुन्हा दाखल करण्यात आला आहे. दरम्यान पोलीस ठाण्यात अपहरण झालेल्या अल्पवयीन मुलीच्या नातेवाईकांनी मोठी गर्दी केली आहे. विशेष म्हणजे पदाधिकारी आणि कार्यकर्तेही मोठ्या संख्येने पोलीस ठाण्यात पोहोचले आहेत. पोलिसांनी तातडीने या संपूर्ण प्रकरणाचा तपास सुरू केला आहे. अपहरणाच्या या प्रकारामुळे अकोला शहरात आणि कृषी नगरपरिसरात खळबळ उडाली आहे. मुलीच्या शोधात सिव्हिल लाईन पोलिसांचे दोन पथकं गठीत करण्यात आली आहेत, मुलीच्या शोधात पथक रवाना झाले आहेत. आतापर्यंत पाच ते सहा संशयितांची पोलिसांकडून चौकशी सुरू आहे.दरम्यान, माजी महिला नेत्या यांच्या नातीचं अपहरण झाल्यावर दुपारी तीन वाजता तक्रार देण्यासाठी गेले असता अपहरणाची तक्रार संध्याकाळी पाच वाजता घेण्यात आली. त्यामुळे कुटुंबीय तसंच कार्यकर्ते यांनी पोलीस स्टेशनबाहेर ठिय्या आंदोलन केलं असून आताही आंदोलन सुरुच ठेवलं आहे. आरोपीला ताबडतोब अटक करण्याची मागणी करण्यात आली आहे.त्याशिवाय शाळेच्या प्रशासनावरही त्यांनी आक्षेप घेत आरोप केले आहेत. शाळेतील प्राध्यापकांना याप्रकरणी पोलीस स्टेशनला तक्रार देण्याबाबत कुटुंबाने सांगितलं, मात्र शाळेतील प्राध्यापक हे गेले नाहीत. तसंच शाळेतील कर्मचाऱ्यांना मुलीला घरचे कोणीही आल्याशिवाय शाळेतून सोडायचं नाही, असं सांगितल्यावरही मुलगी शाळेतून बाहेर कशी आली? हा सवाल मुलीच्या कुटुंबाने शाळा प्रशासनावर उपस्थित केला आहे. पाच-सहा संशयितांची नावं पोलिसांना सांगितली असून शाळेच्या आजूबाजूच्या परिसरातील सीसीटीव्ही कॅमेरे तपासून पोलीस आरोपीचा शोध घेत आहेत.