मुंबई पुणे एक्सप्रेसवेवर ट्रकला भीषण आग, बोगद्यात धुराच्या लोटांमुळे वाहतुकीवर परिणाम.

 एक तासाच्या अथक प्रयत्नांनंतर ट्रकला लागलेली आग विझवण्यात यश आले. परिस्थिती नियंत्रणात आल्याच्या काही काळानंतर हायड्राच्या साहाय्याने ट्रक बोगद्यातुन बाजूला घेऊन वाहतूक सुरु करण्यात आली.मुबंई पुणे एक्सप्रेसवेवर आज पहाटे एका केबल वाहून नेणाऱ्या ट्रकला भीषण आग लागल्याची घटना घडली असून या आगीमुळे बोगद्यात काही काळ मोठ्या प्रमाणात धुर पसरला होता. मुबंई पुणे एक्सप्रेसवेवरून विशाखापट्टणम ते तळोजा येथे लोखंडी रिंगांची वाहतुक करणारा MH 43 BX – 7967 या क्रमांकाचा ट्रक, चालक राहुल जायप्रकाश यादव (वय 27 वर्ष रा रोडपाली कळंबोली, मूळ रा. उत्तर प्रदेश )घेऊन जातं असताना तो बोरघाटात नवीन बोगद्यात आला. अचानक शॉर्टसर्किटमुळे ट्रकला आग लागली.सुदैवाने यात कोणतीही जिवीतहानी झाली नाही. मात्र या आगीमुळे बोगद्यात मोठया प्रमाणात धूर पसरला होता. त्यामुळे बोगद्यात असलेल्या काही वाहनांंमधील प्रवाशांना तात्काळ बोगद्याबाहेर काढल्याने मोठी दुर्घटना टळली आहे.

प्रचंड प्रमाणात धुराचे लोट उठल्याने बोगद्यातील प्रवाशांना काही काळ मात्र श्वसनाचा त्रास जाणवू लागला होता. या घटनेची माहिती मिळताच, खोपोली पोलीस, बोरघाट पोलीस, आयआरबी यंत्रणा, डेल्टा फोर्स, महाराष्ट्र सुरक्षा बल देवदूत यंत्रणा, खोपोली नगरापालिकेचे अग्निशमन दल आदी तात्काळ घटनास्थळी दाखल झाले. मात्र एक तासाच्या अथक प्रयत्नांनंतर ही आग विझवण्यात यश आले. परिस्थिती नियंत्रणात आल्याच्या काही काळानंतर हायड्राच्या साहाय्याने ट्रक बोगद्यातुन बाजूला घेऊन वाहतूक सुरु करण्यात आली.दुसरीकडे, मुंबई-अहमदाबाद राष्ट्रीय महामार्गावर देखील दोन वाहनांची धडक झाल्यानंतर दोनही वाहनांनी पेट घेतला होता. मुंबई जवळील पालघर येथे, वैतरणा नदी पुलाजवळ मंगळवारी पहाटेच्या सुमारास ट्रेलर आणि ट्रक चा एकमेकांना धडकून भीषण अपघात झाला होता. जोरदार धडक झाल्याने दोन्ही वाहनांनी पेट घेतला. प्रसंग पाहून वाहन चालकांनी गाडीच्या बाहेर उडी घेतली. त्यामुळे कोणतीही जिवीत हानी झाली नाही.परंतु दोनही वाहनं जळून खाक झाल्याने वाहन मालकांचं प्रचंड नुकसान झालं. या अपघातामुळे मुंबई-अहमदाबाद राष्ट्रीय महामार्गावरची वाहतुक विस्कळीत झाली होती. अथक प्रयत्नांनंतर आग आटोक्यात आली. आणि वाहतुक पुन्हा सुरु झाली.