वाढत्या तापमानातील दिलासा! राज्यातील ३२ प्रमुख धरणांत सरासरीहून अधिक पाणी, कोणत्या धरणात किती पाणीसाठा?

केंद्रीय जल आयोगाने उन्हाळापूर्व धरणसाठ्यांची आकडेवारी नुकतीच जाहीर केली आहे. त्यामध्ये राज्यातील प्रमुख ३२ धरणांचा समावेश आहे.मार्च महिना नुकताच सुरू झाला असतानाच राज्यात सर्वत्र तापमानाचा पारा चढू लागला आहे. या तापत्या उन्हात सुदैवाने राज्यभरातील ३२ धरणांमध्ये १९ टक्के अधिक पाणीसाठा असल्याचे दिलासादायक चित्र आहे. केंद्रीय जल आयोगाच्या आकडेवारीतून ही माहिती समोर आले आहे.केंद्रीय जल आयोगाने उन्हाळापूर्व धरणसाठ्यांची आकडेवारी नुकतीच जाहीर केली आहे. त्यामध्ये राज्यातील प्रमुख ३२ धरणांचा समावेश आहे.

या ३२ धरणांमध्ये गेल्या वर्षी याच कालावधीत क्षमतेच्या ४८ टक्के जलसाठा होता. तर, याच काळातील मागील दहा वर्षांची सरासरी ५४ टक्के आहे. त्या तुलनेत ही ३२ धरणे सध्या ६५ टक्के भरलेली आहेत, अशी माहिती या आकडेवारीतून पुढे आली आहे.या आकडेवारीनुसार, क्षमतेच्या तुलनेत सर्वाधिक ८७ टक्के जलसाठा हा अहिल्यानगर जिल्ह्यातील भंडारदरा धरणात आहे. तर येल्दारी (जि. परभणी), कोयना व उरमोडी (जि. सातार), इसापूर (जि. यवतमाळ), अप्पर वैतरणा व दारणा (जि. नाशिक), अप्पर तापी (जि. जळगाव) या धरणांत ७० ते ८० टक्क्यांदरम्यान जलसाठा आहे. उर्वरित सर्व धरणे ही क्षमतेच्या ५० ते ७० टक्के भरलेली आहेत.

मात्र एकाही धरणांत सध्या तरी ५० टक्क्यांहून कमी जलसाठा नाही.हवामानातील प्रतिकूल बदलांमुळे पुण्यासह राज्यातील तापमानात सरासरीच्या तुलनेत लक्षणीय वाढ झाली असून सोमवारी लोहगाव परिसरामध्ये राज्यातील उच्चांकी ३९.६ अंश सेल्सिअस तापमान नोंदविण्यात आले. तळेगाव, चिंचवड, लवळे भागात पारा ३८ अंशाच्या पुढे गेला होता, तर पुण्यात ३७.२ अंश सेल्सिअस तापमानाची नोंद झाली.
येत्या आठवड्यात तापमान खाली येणार नसल्याचे हवामान विभागाने म्हटले आहे. गेल्या काही दिवसांपासून शहरात पहाटे गारवा आणि दुपारी कडाक्याचे ऊन अशी स्थिती होती.