जळगाव – पाचोरा दरम्यान दि.२८ फेब्रुवारी रोजी महाविद्यालयातून घरी परतत असतांना अपघात होवून निशाांत विजय पाटील (राजपूत) (वय १९, रा. गोराडखेडा ता. पाचोरा) तरुण गंभीर जखमी झाला होता. त्याच्यावर खाजगी रुग्णालयात उपचार सुरु होते. मात्र सोमवारी दि. ३ मार्च रोजी सकाळी ११ वाजेच्या सुमारास उपचारादरम्यान तरुणाचा मृत्यू झाला आहे. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.

सविस्तर वृत्त असे कि, पाचोरा तालुक्यातील गोराडखेडा येथे निशांत पाटील हा तरुण वास्तव्यास होता. तो जी.एच. रायसोनी अभियांत्रिकी महाविद्यालयात तो प्रथम वर्षाचे शिक्षण घेत होता. दि. २८ रोजी तो दुचाकीने महाविद्यालयातून घरी जाण्यासाठी निघाला. सायंकाळी ८ वाजेच्या सुमारास वावडदा ते वडलीदरम्यान आला असताना त्याच्या दुचाकीचा अपघात झाला. अपघातात निशांतच्या डोक्याला जबर मार लागलेला असल्याने नातेवाईकांनी त्याला जळगाव येथील खाजगी रुग्णालयात उपचारासाठी दाखल केले होते. दरम्यान, निशांतवर उपचार सुरु असताना सोमवारी दि. ३ मार्च रोजी सकाळी ११ वाजेच्या सुमारास त्याचा मृत्यू झाला.

शवविच्छेदनासाठी निशांत याचा मृतदेह शासकीय वैद्यकीय महाविद्यालय व रुग्णालयात आणण्यात आला होता. यावेळी कुटुंबीयांनी एकच आक्रोश केला. दरम्यान, घटनेप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे. त्याच्या पश्चात आई, वडील व बहिण असा परिवार आहे.