धार्मिक कॉरिडॉर तयार करा, मुख्यमंत्री फडणवीसांचे निर्देश, त्र्यंबकेश्वरातील सिंहस्थ मेळ्याच्या पार्श्वभूमीवर निर्णय.

नाशिक, त्र्यंबकेश्वर येथे २०२७ मध्ये होणाऱ्या सिंहस्थ मेळ्याच्या तयारीसंदर्भात मुख्यमंत्री फडणवीस यांच्या अध्यक्षतेखाली मुंबईत आढावा बैठक झाली. त्या वेळी त्यांनी नियोजनासंदर्भात सूचना केल्या‘सिंहस्थ मेळ्यासाठी आलेला भाविक हा नाशिकजवळच्या त्र्यंबकेश्वर, शिर्डी, वणी, शनिशिंगणापूर, मांगीतुंगी अशा धार्मिक स्थळांनाही भेट देण्याच्या अनुषंगाने या धार्मिक स्थळांचे कॉरिडॉर तयार करा,’ असे निर्देश मुख्यमंत्री देवेंद्र फडणवीस यांनी बुधवारी दिले.
नाशिक, त्र्यंबकेश्वर येथे २०२७ मध्ये होणाऱ्या सिंहस्थ मेळ्याच्या तयारीसंदर्भात मुख्यमंत्री फडणवीस यांच्या अध्यक्षतेखाली मुंबईत आढावा बैठक झाली. त्या वेळी त्यांनी नियोजनासंदर्भात सूचना केल्या. या वेळी विभागीय आयुक्त डॉ. गेडाम यांनी प्रयागराजमधील सोयी-सुविधांचे सादरीकरण केले.

हा सिंहस्थ कुंभ ‘डिजिटल टेक्नॉलॉजी कुंभ’ म्हणून ओळखला जावा, यासाठीचे नियोजन करण्याचे निर्देशही फडणवीस यांनी या वेळी दिले.मुख्यमंत्री फडणवीस यांनी नाशिक आणि त्र्यंबकेश्वरमध्ये पायाभूत सुविधा वाढविण्यासंदर्भात निर्देश दिले आहेत. रामकाल पथचे काम वर्षभरात पूर्ण करून त्र्यंबकेश्वर मंदिराच्या संवर्धनाचे काम हाती घेण्याच्या सूचना केल्या आहेत. सिंहस्थ कुंभमेळ्यासाठी कृत्रिम बुद्धिमत्ता व अत्याधुनिक डिजिटल तंत्रज्ञानाचा जास्तीत जास्त वापर करावा. गर्दीचे नियोजन, वाहतूक नियोजन; तसेच सर्व्हेलन्ससाठी जास्तीत जास्त ‘एआय’ तंत्रज्ञानाचा वापर करावा.

ज्या भागातून जास्त गर्दी होते, त्या रस्त्यांवर गर्दीच्या नियोजनासाठी व भाविकांना वेळ घालविता यावा, यासाठी त्या ठिकाणी डिजिटल कुंभसंदर्भातील प्रदर्शन तयार करावे. सिंहस्थ मेळ्याचा लोगो तयार करण्यासाठी स्पर्धा घ्यावी, अशी सूचना फडणवीस यांनी केल्या आहेत.सिंहस्थासाठी नाशिक व त्र्यंबकेश्वर येथे मुंबई, जव्हार, गुजरात, छत्रपती संभाजीनगर, शिर्डी, धुळे, पुणे, मुंबई अशा मार्गांनी भाविक येणार असल्याने रस्ते मार्गाचे बळकटीकरण करण्याच्या सूचना फडणवीस यांनी केल्या आहेत. सिंहस्थ काळात बाहेरील वाहनांना बंदी घालून भाविकांसाठी वाहनतळ ते शहरात प्रवासासाठी ई बसचा पर्याय उपलब्ध करून द्यावा, असे त्यांनी सांगितले.शिर्डी, छत्रपती संभाजीनगर, ओझर या विमानतळांवरही प्रवाशांचे नियोजन करावे. शिर्डी विमानतळावर विमाने थांबविण्यासाठी जागा वाढविण्यात यावी, तसेच ओझर विमानतळावरही अधिक विमानांच्या लँडिंगसाठी सोय उपलब्ध करून द्यावी. नाशिक शहरात हेलिपॅड उभारता येतील का, याचा विचार करण्याचे निर्देशही मुख्यमंत्री देवेंद्र फडणवीस यांनी या वेळी दिले आहेत.