डोक्यावर जखमा, तोंडातून फेस; बेपत्ता चिमुकल्याची बॉडी खाणीत सापडली, ठाण्यात काय घडलं?

आजोबांकडून पैसे घेऊन खाऊ घेण्यासाठी घराबाहेर पडलेला चिमुकला बेपत्ता झाला. त्यानंतर त्याचा मृतदेह सापडला आहे. या घटनेने ठाण्यात एकच खळबळ उडाली आहे.बेपत्ता झालेल्या एका ८ वर्षांच्या निरागस चिमुकल्याचा मृतदेह घराजवळील तलावाजवळ आढळून आला. या घटनेने ठाण्यात एकच खळबळ उडावी आहे. हा चिमुकला खाण्याच्या गोष्टी घेण्यासाठी घराबाहेर पडला होता. त्यानंतर तो बेपत्ता झाला. पोलिसांनी मंगळवारी याबाबतची माहिती दिली. भिवंडीतील वऱ्हाळदेवी तलावाजवळील खाणीत रविवारी त्याचा मृतदेह आढळल्याने पोलिसांनी आकस्मिक मृत्यूची नोंद केली आहे. मुलाच्या डोक्यावर जखमेच्या खुणा असून तोंडातून फेस येत असल्याचा दावा मुलाच्या कुटुंबीयांनी केला आहे.

नारपोली पोलीस ठाण्याच्या अधिकाऱ्याने दिलेल्या अधिक माहितीनुसार, मुलाने शनिवारी संध्याकाळी खाण्याची वस्तू घेण्यासाठी आपल्या आजोबांकडून काही पैसे घेतले आणि तो घरातून बाहेर पडला. पण, तो घरी परतलाच नाही. त्यानंतर त्याच्या कुटुंबीयांनी आजूबाजूच्या परिसरात त्याचा शोध घेतला, मात्र तो कुठेही सापडून आला नाही. त्यामुळे कुटुंबीयांची चिंता वाढली. त्यानंतर त्यांनी नारपोली पोलिसात हरवल्याची तक्रार दाखल केली. यामध्ये अज्ञात व्यक्तींविरुद्ध अपहरणाचा गुन्हा दाखल करण्यात आला आहे.अधिकाऱ्याने सांगितले की, रविवारी सकाळी ११ वाजण्याच्या सुमारास मुलाचा मृतदेह खाणीत सापडला. त्याचा मृतदेह ताब्यात घेऊन तो पोस्टमॉर्टमसाठी मुंबईतील सरकारी जेजे हॉस्पिटलमध्ये पाठवण्यात आला. सध्या या चिमुकल्याच्या शवविच्छेदन अहवालाची प्रतीक्षा असून मुलाच्या मृत्यूची सर्व बाजूंनी चौकशी केली जात आहे, असंही पोलिसांनी सांगितलं आहे.बिहारमधील समस्तीपूरमध्येही असाच एक प्रकार समोर आला आहे. येथे विहिरीत एकाच कुटुंबातील तीन मुलांचे मृतदेह सापडले होते. ही मुलं शनिवारपासून बेपत्ता होती, त्यानंतर कुटुंबीयांनी पोलिसांत हरवल्याची तक्रार दाखल केली होती. शोध घेत असताना घराजवळील विहिरीत त्यांचे मृतदेह आढळून आले. पतीसोबत भांडण झाल्यानंतर मुलांच्या आईने त्यांचा खून करून मृतदेह विहिरीत फेकल्याचे तपासात उघड झाले आहे.