गर्लफ्रेण्डला भेटायला चौघं गुपचूप रात्री गेले, गावकऱ्यांनी खोलीत डांबून बदडलं, धुळ्यात तरुणाचा मृत्यू.

 मैत्रिणींना भेटण्यासाठी गेलेल्या तरुणावर संशय घेत गावकऱ्यांनी त्याला आणि त्याच्या मित्रांना रात्रभर डांबून ठेवत अमानुष मारहाण केली. या मारहाणीत एका युवकाचा मृत्यू झाला असून, त्याचा मृतदेह गावातील नाल्यात फेकून देण्यात आल्याने परिसरात तीव्र संतापाची लाट उसळली आहे.मैत्रिणींना भेटण्यासाठी गेलेल्या तरुणावर संशय घेत गावकऱ्यांनी त्याला आणि त्याच्या मित्रांना रात्रभर डांबून ठेवत अमानुष मारहाण केली. या मारहाणीत एका युवकाचा मृत्यू झाला असून, त्याचा मृतदेह गावातील नाल्यात फेकून देण्यात आल्याने परिसरात तीव्र संतापाची लाट उसळली आहे. ही धक्कादायक घटना धुळे जिल्ह्यातील शिरपूर तालुक्यातील काळापाणी गावात घडली.शिरपूर तालुक्यातील उमर्दा गावातील २० वर्षीय कमलसिंग पावरा हा आपल्या तीन मित्रांसोबत काळापाणी गावात गेला होता. स्थानिक गावातील एका मुलीला भेटण्यासाठी ते तिथे पोहोचले होते. मात्र, गावकऱ्यांना या गोष्टीचा संशय आल्याने त्यांनी चौघांना पकडले आणि एका घरात डांबून ठेवले. यानंतर, संपूर्ण रात्रभर त्यांना अमानुषपणे मारहाण करण्यात आली.

सकाळी या घटनेची माहिती उमर्दा गावातील नागरिकांना मिळाली. त्यांच्या सुटकेसाठी काळापाणी गावकऱ्यांनी प्रत्येकी ५,००० रुपये मागितले. मध्यस्थीअंती तीन तरुणांची सुटका करण्यात आली, मात्र कमलसिंग पावराच्या संदर्भात विचारणा केल्यावर तो रात्रीच पळून गेल्याचा दावा करण्यात आला.या घटनेनंतर कमलसिंग पावरा हा घरी परतला नाही. म्हणून उमर्दा गावातील ग्रामस्थांनी आणि त्याच्या नातेवाईकांनी त्याचा शोध सुरू केला. अखेर, दोन्ही गावांच्या सीमेवर असलेल्या नाल्यात त्याचा मृतदेह आढळून आला. त्याच्या शरीरावर जबर मारहाणीचे व्रण होते. त्यामुळे त्याला बेदम मारहाण करून, नंतर नाल्यात फेकल्याचा संशय बळावला आहे.या घटनेची माहिती मिळताच शिरपूर तालुका पोलिसांनी घटनास्थळी धाव घेत मृतदेह ताब्यात घेतला आणि शवविच्छेदनासाठी पाठवला. मात्र, कमलसिंग पावराच्या नातेवाईकांचा संताप अनावर झाला. त्यांनी थेट काळापाणी गाव गाठले आणि संशयित आरोपींच्या घरासमोरच मृतदेहावर अंत्यसंस्कार केले. त्यानंतर संतप्त ग्रामस्थांनी आरोपींच्या घरांची तोडफोड केली.या प्रकरणी शिरपूर तालुका सांगवी पोलिस ठाण्यात सात जणांविरुद्ध खुनाचा गुन्हा दाखल करण्यात आला आहे. पोलिसांनी तातडीने तपास सुरू करत एका आरोपीला अटक केली असून, उर्वरित आरोपींचा शोध सुरू आहे.