शासकीय कार्यालयांच्या इमारती शहराबाहेर स्थलांतरीत होणार, त्र्यंबकेश्वरचे रूपडे पालटणार.

त्र्यंबकेश्वर शहराचं रुप पूर्णपणे पालटणार असून शासकीय कार्यालयांच्या इमारती शहराबाहेर करण्यात येणार आहेत. तसंच मंदिरासाठीही काही मागण्या करण्यात आल्या आहेत.आगामी सिंहस्थाच्या नियोजनात त्र्यंबकेश्वर शहरातील शासकीय कार्यालयांच्या इमारती शहराबाहेर स्थलांतरीत करण्यासाठी हालचालींना वेग आला आहे. यामध्ये त्र्यंबक नगर परिषद, प्रशासकीय कार्यालय इमारतीचा समावेश आहे. या इमारती शहर वस्तीपासून दूर गेल्यास त्र्यंबकेश्वर शहराचे रूप पूर्णत: बदलणार आहे.शहराच्या वाढीव हद्दीत ग्रामदेवता महादेवी मंदिर ट्रस्टची सुमारे १६ एकर जमीन आहे. या जमिनीवर शहर विकास योजनेत क्रीडा संकुलाचे आरक्षण टाकण्यात आले आहे.

सरकारी इमारतींसाठी आवश्यक तेवढी जमीन ताब्यात घेऊन उर्वरीत जमिनीवरील आरक्षण वगळण्याचा अधिकाऱ्यांचा मानस आहे. गत आठवड्यात विभागीय आयुक्त डॉ. प्रवीण गेडाम यांचा पाहणी दौरा झाला तेव्हा या जमिनीवर काही स्थानिक पदाधिकाऱ्यांच्या समवेत जाऊन समक्ष पाहणी केली. त्यानंतर बुधवारी प्रांताधिकारी ओमकार पवार यांनी पाहणी करीत महादेवी मंदिर ट्रस्ट पदाधिकारी यांच्यासमवेत बैठक आयोजित करण्यात आली होती.त्र्यंबकेश्वर शहरातील प्रशासकीय इमारतीला ४० वर्षांचा कालावधी लोटल्याने ती इमारत पाडून नव्याने बांधण्याचे ठरले आहे. मात्र, तहसील कार्यालयाची इमारत अगदी अलीकडे १३ वर्षांपूर्वी बांधण्यात आली आहे. त्याच्या बाजूला असलेल्या पशुवैद्यकीय दवाखान्याच्या जागेत पंचायत समितीच्या इमारतीचे भूमिपूजन झाले आहे. संत निवृत्तिनाथ मंदिर परिसरात भूमीअभिलेख अधीक्षक कार्यालय आहे. जवळच सिंहस्थ १९९१ दरम्यान बांधलेले अल्पबचत भवन निवासी इमारत आहे. या सर्व इमारती दोन किमी अंतरावर असलेल्या महादेवी मंदिर ट्रस्टच्या जागेत एकाच छताखाली बांधण्याचे शासनाचे नियोजन आहे.

बसस्थानक आणि मंदिर यापासून जवळच उपजिल्हा रुग्णालय गेल्या अनेक वर्षांपासून तिथेच आहे. उपजिल्हा रुग्णालयाचा दर्जा मिळाल्यानंतर आवश्यक त्या सुविधांसाठी इमारतीचे बांधकाम गत वर्षीपर्यंत सुरू होते. सिंहस्थात १०० खाटांचे रुग्णालय बांधण्यात येणार आहे. त्यासाठी जव्हार रस्त्यावर जागा निश्चित करण्याचा प्रयत्न आहे. त्यामुळे उपजिल्हा रुग्णालयदेखील स्थलांतरीत करण्याचा शासनाचा मानस दिसून येत आहे.त्र्यंबकेश्वर मंदिरासाठी कॉरिडॉर करताना तो संत गजानन महाराज संस्थान प्रवेश कमानीपासून ते थेट त्र्यंबकेश्वर मंदिर प्रवेशद्वारापर्यंत करण्यात यावा, अशी मांडणी अधिकारी करीत आहेत. या दरम्यान येणारी शासकीय कार्यालये महादेवी संस्थानच्या जागेत स्थलांतरीत करण्याकडे कल आहे. सिंहस्थ नियोजनात त्र्यंबकनगरीचा चेहरा मोहरा बदलणार असे दिसून येत आहे. मागच्या शतकापासून अनेक वर्ष बसस्थानक, नगर परिषद कार्यालय यांचा सराव झालेल्या नागरिकांना तसेच ग्रामीण भागातील नागरिकांना यापुढील कालावधीत कामकाजासाठी दोन किमी पायपीट करावी लागणार आहे.शासकीय इमारती स्थलांतरीत केल्यानंतर मोकळे होणारे भुखंड सिंहस्थात गर्दीचे नियोजन करण्यासाठी वापरात येतील, अशी वरिष्ठ अधिकाऱ्यांची संकल्पना आहे. तथापि, अवघ्या चार दोन दिवसांच्या शाही पर्वणीसाठी शहरात होणारी उलथापालथ कितपत योग्य ठरेल आणि खरोखरच त्याचा काही फायदा होईल का? अशी शंका नागरिक उपस्थित करीत आहेत. या सर्व घडामोडीत मोकळे असलेले सरकारी भुखंड कुठे गेले याचा मात्र संबंधित यंत्रणेला विसर पडल्याची चर्चा होत आहे. दरम्यान, नगर परिषद मालकीच्या व्यापारी संकुलाबाबत काय होते, याकडे देखील अनेकांचे लक्ष लागले असून, व्यवसायाची घडी बिघडण्याची भीती व्यक्त होत आहे.