अखेर ठाकरे गटाला मोठं खिंडार, राजन साळवी यांचा एकनाथ शिंदेंच्या शिवसेनेत अधिकृत प्रवेश.

 माजी मुख्यमंत्री उद्धव ठाकरे यांना अखेर कोकणात मोठा धक्का बसला आहे. कारण गेल्या अनेक दिवसांपासून ज्यांच्या शिवसेना पक्षप्रवेशाची चर्चा होती, त्या राजन साळवी यांचा आज अखेर एकनाथ शिंदे यांच्या शिवसेनेत प्रवेश झाला आहे. ठाण्यात आनंद आश्रम बाहेर अतिशय भव्यदिव्य असा पक्षप्रवेशाचा कार्यक्रम पार पडला.शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांचे विश्वासून नेते राजन साळवी यांनी आज अखेर उपमुख्यमंत्री एकनाथ शिंदे यांच्या शिवसेनेत प्रवेश केला आहे. राजन साळवी हे कोकणातील उद्धव ठाकरे यांच्या पक्षातील मोठे नेते होते. गेल्या 35 वर्षांपासून ते शिवसेनेचं काम करत आहेत.

एकनाथ शिंदे यांनी बंड पुकारल्यानंतरही सगल तीन वर्षे त्यांनी उद्धव ठाकरे यांच्याप्रती असणारी आपली निष्ठा कायम ठेवली. विशेष म्हणजे दरम्यानच्या काळात त्यांना अनेक कारवायांना सामोरं जावं लागलं. विविध तपास यंत्रणांच्या चौकशीला सामोरं जावं लागलं. ते तीनवेळा आमदार म्हणून निवडून आले आहेत. नुकत्याच तीन महिन्यांपूर्वी पार पडलेल्या विधानसभा निवडणुकीतही त्यांनी उमेरवारी लढवली होती. पण त्यांचा पराभव झाला.दरम्यान, गेल्या काही दिवसांपासून राजन साळवी हे एकनाथ शिंदे यांच्या शिवसेनेत प्रवेश करतील, अशी सातत्याने चर्चा समोर येत होती. पण त्यांचा पक्षप्रवेश रखडला होता. अखेर त्यांच्या पक्षप्रवेशाला आज मुहूर्त मिळाला. ठाण्यात आनंद आश्रमाच्या बाहेर राजन साळवी यांचा पक्षप्रवेशाचा भव्य कार्यक्रम पार पडला. यावेळी ठाकरे गटाच्या लांझा आणि राजापूरहून आलेल्या शेकडो पदाधिकारी आणि कार्यकर्त्यांनी राजन साळवी यांच्यासह शिवसेनेत प्रवेश केला. राजन साळवी यांच्या पक्षप्रवेशावेळी मंत्री उदय सामंत आणि आमदार किरण सामंत हे दोन्ही बंधू उपस्थित होते. तसेच शिवसेनेच्या अनेक दिग्गज नेत्यांच्या उपस्थित हा पक्षप्रवेशाचा भव्य कार्यक्रम पार पडला. दरम्यान, पक्षप्रवेशाच्या कार्यक्रमाआधी राजन साळवी हे एकनाथ शिंदे यांच्या ठाण्यातील शुभदीप बंगल्यात गेले. यावेळी दोन्ही नेत्यांमध्ये बैठक झाल्याची माहिती आहे.राजन साळवी यांच्या पक्षप्रवेशानंतर आता पक्ष त्यांना कोणती जबाबदारी देणार? याकडे राज्याचं लक्ष असणार आहे. कारण राजन साळवी यांना विधान परिषदेतून आमदारकी देण्याचं आश्वासन दिलं असेल तर मग त्यांच्यासाठी ही मोठी संधी असेल. साळवी याआधी तीनवेळा आमदार म्हणून जिंकून आले आहेत. त्यामुळे त्यांना आगामी काळात मंत्रिमंडळातही स्थान मिळतं का? ते पाहणं देखील महत्त्वाचं आहे. दरम्यान, साळवी यांच्या पक्षप्रवेशाने एकनाथ शिंदे यांच्या शिवसेनेची ताकद ही रत्नागिरीत दुप्पट झाली आहे.”मी 9 तारखेला सकाळी भाईंना भेटलो, भाईंचे आशीर्वाद घेतले. कुटुंबातील एक सदस्य मागे राहिला होता. तो तुमच्या कुटुंबात परत येऊ इच्छित असल्याची इच्छा व्यक्त केली. माझ्यासोबत माझ्या मतदारसंघाचे अनेक मंडळी शिवसेनेत येऊ इच्छित असल्याचं भाईंना सांगितलं. यानंतर आजचा हा शुभ दिवस आला आहे”, असं राजन साळवी पक्षप्रवेशावेळी म्हणाले.