चहा द्यायला निघाले, वाटेत भरधाव ट्रकने चिरडले अन् कुटुंबाचा आधार गेला; अकोला हळहळलं.

चहा द्यायला बाजारात जात असताना भरधाव ट्रकने धडक दिली आणि त्यात या चहा विक्रेत्याचा जागीच मृत्यू झाला आहे. या घटनेने परिसरात एकच खळबळ माजली आहे.अकोला शहरात अपघाताचे प्रमाण मोठ्या प्रमाणात वाढले आहे. अपघातात अनेकांचा मृत्यूही झाला आहे. अशीच घटना अकोला शहरातील जुने शहर पोलीस स्टेशन अंतर्गत येत असलेल्या नवीन किराणा मार्केटमध्ये घडली आहे. किराणा मार्केटमध्ये एका भरधाव ट्रकने धडक दिल्याने, एका वयोवृद्ध चहा विक्रेत्याचा जागीच मृत्यू झाल्याची दुर्दैवी घटना घडली आहे. या घटनेमुळे परिसरात हळहळ व्यक्त केली जात आहे. रामदास श्रीराम रत्नाळे असं वयोवृद्ध इसमाच नाव आहे. ते चहा देण्यासाठी जात असताना भरधाव ट्रकच्या धडकेत त्यांचा मृत्यू झाला आहे.

शिवसेना वसाहतीत राहणारे रामदास श्रीराम रत्नाळे यांची किराणा मार्केटच्या जवळ चहाची टपरी आहे. रोजच्या नित्यनियमाप्रमाणे ते बाजारात चहा घेऊन जात होते. तेवढ्यात एमएच ३० बीडी ७७५७ या क्रमांकाच्या ट्रकने भरधाव वेगात येऊन त्यांना समोरून जोरदार धडक दिली. या धडकेत रामदास रत्नाळे गंभीर जखमी झाले आणि त्यांचा जागीच मृत्यू झाला.अपघातानंतर ट्रक चालकाने घटनास्थळावरून पळ काढला. घटनेची माहिती मिळताच जुने शहर पोलिसांनी तत्काळ घटनास्थळी धाव घेतली आणि ट्रक ताब्यात घेतला. मात्र, अद्याप ट्रक चालकाचा शोध लागलेला नाही.या दुर्दैवी घटनेनंतर मृतकाच्या कुटुंबीयांनी एकच आक्रोश केला. नातेवाईक आणि स्थानिक नागरिकांनी पोलिसांकडे चालकाला लवकर अटक करण्याची मागणी केली आहे. तसेच, आरोपीला कठोर शिक्षा देऊन न्याय मिळावा, अशीही मागणी केली जात आहे.जुने शहर पोलीस या प्रकरणाचा पुढील तपास करत असून, ट्रक चालकाला शोधण्यासाठी विविध पथके तयार करण्यात आली आहेत. परिसरातील सीसीटीव्ही फुटेज तपासले जात आहेत आणि लवकरच आरोपीला अटक केली जाईल, असा विश्वास पोलिसांनी व्यक्त केला आहे.या अपघातामुळे परिसरात भीतीचे वातावरण पसरले असून, रहदारीच्या नियमांचे पालन न करणाऱ्या वाहनचालकांविरोधात कठोर कारवाई करण्याची मागणी नागरिक करत आहेत.