विद्यापीठाच्या क्रीडा संकुलाचा स्लॅब कोसळला, जागतिक दर्जाचा दावा फोल, विद्यार्थी थोडक्यात वाचले.

मुंबई विद्यापीठाच्या विद्यार्थ्यांना जागतिक दर्जाच्या क्रीडा सुविधा पुरवण्याचा दावा करणाऱ्या शारीरिक शिक्षण विभागाच्या कलिना येथील क्रीडा संकुलाचा सिमेंटचा स्लॅब कोसळला.मुंबई विद्यापीठाच्या विद्यार्थ्यांना जागतिक दर्जाच्या क्रीडा सुविधा पुरवण्याचा दावा करणाऱ्या शारीरिक शिक्षण विभागाच्या कलिना परिसरातील क्रीडा संकुलाची दुर्दशा पुन्हा चव्हाट्यावर आली आहे. शनिवारी या क्रीडा संकुलात व्हॉलीबॉल स्पर्धेचा अंतिम सामना सुरू असताना सिमेंटचा स्लॅब कोसळला. खेळ थोड्या अंतरावर सुरू असल्याने खेळाडू बालंबाल बचावले. विद्यापीठ प्रशासनाने मात्र, ‘स्लॅब कोसळला नसून भिंतीवरील विटा खिळखिळ्या झाल्याने तो भाग पडला’ असे स्पष्टीकरण दिले आहे.

मुंबई विद्यापीठाच्या कलिना परिसरातील शारीरिक शिक्षण विभागाच्या क्रीडा संकुलातील बंदिस्त संकुलात शनिवारी आंतरशालेय व कनिष्ठ महाविद्यालय व्हॉलीबॉल स्पर्धेचा अंतिम सामना सुरू होता. त्या वेळी या संकुलातील एका बाजूला असलेल्या भिंतीच्या छताजवळील स्लॅबचा काही भाग कोसळला. या वेळी या भिंतीजवळ कोणीही नसल्याने जीवितहानी टळली. विशेष म्हणजे, या क्रीडा संकुलाच्या दुरवस्थेला ‘महाराष्ट्र टाइम्स’ने वेळोवेळी वाचा फोडली होती. या क्रीडा संकुलात असलेल्या बहुउद्देशीय सभागृहात मेपलवूड फ्लोअरिंग बसवण्यात आले होते. मात्र अनेक ठिकाणी या लाकडाच्या पट्ट्या उखडल्याने त्यांच्या जागी मेपलवूडऐवजी साध्या लाकडाच्या पट्ट्या लावण्यात आल्या होत्या. तसेच काही ठिकाणी भिंतींजवळील प्लास्टरही उखडले होते.शनिवारी या बहुउद्देशीय सभागृहाच्या कोपऱ्यातील भिंतीचा काही भाग कोसळला. या वेळी इथे सामना सुरू असल्याने विद्यार्थ्यांमध्ये एकच घबराट पसरली. मात्र या कोपऱ्यातील भागात प्रेक्षक किंवा खेळाडू नसल्याने कोणतीही जीवितहानी झाली नाही. या सभागृहात विद्यापीठस्तरीय अनेक स्पर्धा कायम सुरू असतात. त्यामुळे या बहुउद्देशीय सभागृहाचे स्ट्रक्चरल ऑडिट तातडीने झाले पाहिजे. तसेच जून-जुलै महिन्यात या सभागृहाची देखभाल-दुरुस्ती केलेल्या कंत्राटदारावर कठोर कारवाई व्हायला हवी, अशी मागणी विद्यार्थी संघटना करत आहेत.