वसईतील ज्वेलरवर दरोडा, ७१ लाखांची लूट; पोलिसांनी केवळ एका हॉर्नच्या आवाजावर अख्खी केस सोडवली.

वसईच्या बाभोळा येथे असलेल्या मयंक ज्वेलर्स या सराफाच्या दुकानावावर १० जानेवारी रोजी दोन अनोळखी दरोडेखोरांनी सशस्त्र दरोडा टाकला होता.वसईतील मयंक ज्वेलर्स दुकानावर घालण्यात आलेल्या दरोड्याचा उलगडा करण्यात माणिकपूर आणि वालीव पोलिसांच्या गुन्हे शाखेला यश आले आहे. या प्रकरणी पोलिसांनी पाच जणांच्या टोळीला अटक केली आहे. विचित्र अशा दुचाकीच्या हॉर्नच्या आवाजामुळे या संपूर्ण प्रकरणाचा उलगडा झाला.

वसईच्या बाभोळा येथे असलेल्या मयंक ज्वेलर्स या सराफाच्या दुकानावावर १० जानेवारी रोजी दोन अनोळखी दरोडेखोरांनी सशस्त्र दरोडा टाकला होता. बंदुकीचा धाक दाखवत, तसेच दुकानाचे मालक महेंद्र संघवी यांना कोयत्याने मारहाण करत दुकानात असलेले ७१ लाखांचे दागिने लुटून नेले होते.या प्रकरणाचा तपास माणिकपूर आणि वालीव पोलिसांच्या गुन्हे प्रकटीकरण शाखेतर्फे संयुक्त सुरू होता. आरोपी दुचाकीवरून गेले होते. यासाठी पोलिसांनी परिसरातील ६०० हून अधिक सीसीटीव्ही तपासले होते.दरम्यान, एका सीसीटीव्हीमध्ये गिरीजच्या टोकपाडा येथे एक दुचाकी एका घरावजळ हॉर्नचा विशिष्ट आवाज करत थांबली होती. त्यानंतर घरातील व्यक्ती बाहेर आला आणि सर्व त्या घरात शिरले. हॉर्न संशयास्पद वाटल्याने त्यावरून पोलिसांनी तपास सुरू केला. तपासात ते घर रॉयल उर्फ रॉय एडव्हर्ड सिक्वेरा (४६) याचे होते. त्याची पोलिसांनी माहिती काढल्यावर तो सराईत गुन्हेगार असल्याचे समजले.त्यानंतर पोलिसांनी त्याचा कसून तपास केल्यानंतर सापळा रचून इतर चार आरोपींना अटक केली. यामध्ये रॉयल उर्फ रॉय एडव्हर्ड सिक्वेरा याच्यासह अनुज चौगुले (३६) या दोन मास्टरमाईंडसह सौरभ राक्षे (२७) सीताराम मोरे (५६) आणि अमर निमगिरे (२१) यांचा समावेश आहे.वसईच्या गिरीज गावात राहणारा रॉय याच्याविरोधात २० तर नालासोपाऱ्यात राहणाऱ्या अनुज चौगुले याच्याविरोधात १२ गुन्हे दाखल आहेत. त्यांना मोक्का अंतर्गत अटकही करण्यात आली होती. मात्र, मागील वर्षी एप्रिलमध्ये ते तुरूंगातून सुटले असल्याची माहिती पोलिसांनी दिली.