झाडावर आदळून स्कूल बस पलटी, शाळेत जाण्याआधीच नववीच्या विद्यार्थिनीवर काळाचा घाला

यवतमाळमध्ये स्कूल बसचा भयानक अपघात झाला असून एका विद्यार्थिनीचा मृत्यू आहे. या अपघातात 11 विद्यार्थी गंभीर जखमी झाले आहेत. अपघात झाल्यानंतर घटनास्थळावरून बसचालक फरार झाला आहे. उपजिल्हा रुग्णालयात जखमींवर उपचार सुरू आहेत.यवतमाळमध्ये भीषण अपघाताची घटना घडलीये. स्कूल बसचा मोठा अपघात झाला. या अपघातात एका विद्यार्थिनीचा जागीच जीव गेला आणि 11 विद्यार्थी गंभीर जखमी आहेत. 30 विद्यार्थ्यांवर उपजिल्हा रुग्णालयात उपचार सध्या सुरू आहेत. ही घटना यवतमाळच्या उमरखेडमधील पिंपरी दिवटी गावाजवळ घडली. शाळेत जात असताना बसचा अपघात झाला. अपघाताची माहिती मिळताच लोकांनी घटनास्थळी धाव घेतली. या अपघातानंतर हळहळ व्यक्त केली जातंय.

हा अपघात उमरखेड तालुक्यातील पिंपरी दिवटी गावाजवळ सकाळी आठच्या दरम्यान झाला आहे. नववीत शिकणारी महिमा आप्पाराव सरकटे (वय 15) असे अपघातात मृत्यू झालेल्या विद्यार्थिनीचे नाव आहे. हे सर्व विद्यार्थी दहागाव येथील एका इंग्रजी माध्यमाच्या शाळेत शिक्षण घेतात. आज सकाळी सर्व विद्यार्थी दिवटी पिंपरीवरून स्कूल बसने दहागावला शाळेत जात असताना बसचा स्टेअरिंगरॉड तुटल्याने चालकाचे नियंत्रण सुटले.बसचा स्टेअरिंगरॉड तुटल्याने ही बस थेट एका झाडावर आदळली आणि पलटली झाली. धक्कादायक म्हणजे अपघाताची घटना घडताच बसचालक हा घटनास्थळावरून फरार झाला. अपघाताची माहिती मिळताच ग्रामस्थ मदतीसाठी धावून आले. विद्यार्थ्यांना ग्रामस्थांनी उमरखेडच्या शासकीय रुग्णालयात दाखल केले. वैद्यकीय अधिकाऱ्यांनी तपासात महिमा सरकटे या विद्यार्थीला मृत घोषित केले.

अपघाताची माहिती मिळताच पालकमंत्री संजय राठोड यांनी जिल्हाधिकारी व पोलिस अधीक्षक यांच्याशी संपर्क साधून अपघातग्रस्तांना तातडीने सर्व प्रकारची मदत करण्याचे निर्देश दिले. अपघातासाठी दोषी असलेल्यांवर गुन्हे दाखल करून घटनेची चौकशी करण्याचे निर्देश दिले आहेत. सर्व शाळांच्या स्कूल बसची तपासणी करण्याचे आदेश देखील संजय राठोड यांनी दिले आहेत. या अपघातानंतर आता स्कूल बस चालकाचा शोध हा घेतला जातोय. या घटनेने सर्वांनाच मोठा धक्का बसल्याचे बघायला मिळत आहे. अपघातानंतर अधिकाऱ्यांनीही रूग्णालयात धाव घेतली.