आज तुमको खत्म कर देता; हवालदारावर सुऱ्याने वार, हाताला चावा अन् मग… धडकी भरवणारी घटना.

पोलीस एका मोबाईल चोराला पकडायला गेले असता त्या चोराने पोलिसांवर जीवघेणा हल्ला केल्याची धक्कादायक घटना घडली आहे. यावेळी चोराने एका हवालदारावर जीवघेणा हल्लाही केला. जटवाटा रोडवरील सईद कॉलनी येथे असलेल्या एका सराईत मोबाईल चोराला पकडण्यासाठी गुन्हे शाखेचे पथक पोहोचले. चोराने गुन्हे शाखेच्या पथकावर प्राण घातक हल्ला केला. तसेच सुऱ्याचा धाक दाखवून प्रतिकाराचा प्रयत्न करीत, चोराला धरण्यासाठी आलेल्या एका पोलिस हवालदाराला चावा घेऊन जखमी केल्याची घटना घडली. ताब्यात घेण्यात आलेल्या आरोपीचे नाव शेख वाहेद शेख मोहसीन (वय २१, रा. सईदा कॉलनी, जटवाडा रोड, हर्सूल) असे आहे.या प्रकरणी गुन्हे शाखेच्या पथकाचे पोलिस अंमलदार विजय रामराव भानुसे (वय ३८) यांनी दिलेल्या तक्रारीनुसार, १९ जानेवारी रोजी गुन्हे शाखेचे उपनिरीक्षक प्रवीण वाघ हे पथकासह फरार गुन्हेगार व अवैध धंद्याविरोधात कारवाई करण्यासाठी शहरात गस्त घालत होते. वाघ यांचे पथक उद्धवराव पाटील चौकात असतांना, शेख वाहेद या सराईत मोबाइल चोराकडे चोरीचा मोबाइल आहे. अशी माहिती मिळाली. या माहितीवरुन वाघ व त्यांच्या पथकाने शेख वाहेद याचा शोध सुरू केला असता, शेख वाहेद हा जटवाडा रोडवरील अल्फा रुग्णालयाजवळ असल्याची माहिती त्यांना मिळाली.

या माहिती आधारे गुन्हे शाखेचे पथक शेख वाहेद याला पकडण्यासाठी गेले. शेख वाहेद याला पकडण्यासाठी पथक त्याच्या समोर आले असता शेख वाहेद याने पोलिसांवर सुरा उगारुन अश्लील शिवीगाळ केली. तसेच आज तुमको खत्म कर देता असे म्हणत हवालदार विजय निकम यांच्यावर प्राण घातक हल्ला चढविला. निकम यांनी शेख वाहेद याच्या कमरेला पाठीमागून पकडले असता, त्याने निकम यांच्या हाताच्या दंडाला चावा घेत जखमी केले. पथकातील इतर सदस्यांनी शेख वाहेद या आरोपीला पकडण्याचा प्रयत्न केला असता शेख वाहेद याने त्यांच्याशी देखील झटापट केली. मात्र, पोलिसांनी बळाचा वापर करीत शेख वाहेद याला ताब्यात घेतले.शेख वाहेद याची झडती घेतली असता त्याच्या ताब्यातून एक मोबाइल मिळाला. हा मोबाइल शेख वाहेद याने कांचनवाडी येथील दुकानाचे एक शटर उचकटून चोरी केल्याची कबुली दिली. तसेच त्याच्या ताब्यातून एक सुराही जप्त करण्यात आला आहे. प्रकरणात बेगमपुरा पोलिस ठाण्यात गुन्हा दाखल करण्यात आला असुन पुढील तपास सहायक निरीक्षक शेषराव खटाने करीत आहेत. ही कारवाई गुन्हे शाखेचे उपनिरीक्षक प्रवीण वाघ, हवालदार विजय निकम, मनोहर गिते, कृष्णा गायके, विजय भानुसे आणि ज्ञानेश्वर पवार आदींनी केली.