धरणगाव शहरात महिला प्रसाधनगृहाची मागणी.

धरणगाव शहरात महिला प्रसाधनगृहाची मागणी अन्यथा.. राष्ट्रवादी (श.प.)काँग्रेस पक्षातर्फे आंदोलन..

धरणगाव तालुका प्रतिनिधी – राजु बाविस्कर

धरणगाव : येथील हनुमान नगर परिसरातील रहिवासी कुसुमबाई अशोक ठाकूर यांनी नगरपरिषद, तहसिलदार, जिल्हाधिकारी, पालकमंत्री यांना पोस्टाद्वारे निवेदन सादर करत कोट बाजार, धरणी बाजार, आठवडे बाजार परिसरात महिलांसाठी सार्वजनिक प्रसाधनगृह ची मागणी केली आहे.
याबाबत सविस्तर माहिती अशी की, दररोज सकाळी कोट बाजार परिसरात भाजीपाल्याचा लिलाव होतो. तद्नंतर कोट बाजार, धरणी बाजार, आठवडे बाजार व शहरातील विविध शॉपिंग कॉम्प्लेक्स परिसरात भाजीपाला, हातगाडी, फळविक्री अश्या ठिकाणी विविध व्यवसाय केले जातात. याठिकाणी व्यावसायिक पुरुष व महिला दोघे असून देखील फक्त पुरुषांसाठी प्रसाधनगृहाची सोय आहे. मात्र महिलांसाठी नाही ही अतिशय गंभीर बाब आहे. खरं म्हणजे देशात सर्वच पदावर आज महिला कारभार सांभाळत आहेत एवढंच नाही तर देशाच्या राष्ट्रपती द्रौपदी मुर्मु या देखील एक महिला आहेत. असं असतांना धरणगाव या तालुक्याच्या ठिकाणी महिलांची जर अशा प्रकारे गैरसोय होत असेल तर ही खेदाची बाब आहे. धरणगाव शहर हे जवळपास पन्नास हजार लोकसंख्या असलेले शहर आहे. धरणगाव हे तालुक्याचे ठिकाण असून शहरात कामानिमित्त येणाऱ्या तालुका परिसरातील महिला भगिनींची वर्दळ बघता महिलांसाठी मुतारी व शौचालय नाही. गावातील कोट बाजार, धरणी बाजार यांसह विविध शॉपिंग कॉप्लेक्स असलेल्या परिसरात महिलांसाठी प्रसाधनगृहाची सोय लवकरात लवकर करण्यात यावी. याबाबतची मागणी पोस्टल निवेदनाद्वारे कुसुमबाई ठाकुर यांनी केली आहे.

दिलेल्या निवेदनात नमूद केलेल्या मागणीची लवकरात लवकर दखल घेऊन शासन स्तरावर या प्रश्नाची कायमस्वरूपी सोडवणूक करण्यात यावी अन्यथा संघटित आंदोलन उभे करण्यात येईल असा इशारा राष्ट्रवादी काँग्रेस (शरदचंद्र पवार) गटाचे शहराध्यक्ष लक्ष्मणराव पाटील यांनी दिला आहे.