पुण्यातील शिक्षिकेचा तो प्रवास अखेरचा, निवृत्तीच्या तोंडावर काळाचा घाला, अपघातात ९ जणांचा अंत

नारायणगाव येथे झालेल्या अपघातात नऊ जणांचा जागीच मृत्यू झाला. यामध्ये एका शिक्षिकेचाही समावेश होता.पुणे-नाशिक महामार्गावर भीषण अपघात झाला आहे. यात नऊ जणांचा जागीच मृत्यू झाल्याची घटना घडली आहे. वडगाव कांदळी ते १४ नंबर या भागातून काही प्रवासी खाजगी गाडीने नारायणगावच्या दिशेने निघाले होते. मात्र, प्रवासी वाहतूक करणाऱ्या या गाडीला आयशर कंपनीच्या वाहनाने जोरात धडक दिली. त्यामुळे प्रवासी वाहतूक करणारी गाडी समोर थांबलेल्या एसटी बसला जाऊन धडकली. या अपघातात नऊ जणांचा जागीच मृत्यू झाल्याची माहिती समोर येत असून मृतांमध्ये एका शिक्षिकेचा देखील समावेश आहे. या शिक्षिकेला निवृत्तीसाठी अवघे दोन वर्ष बाकी होते. मात्र, या अपघाताने या शिक्षिका निवृत्त होण्याआधीच काळाने त्यांच्यावर घाला घातला. या घटनेने शिक्षिकेच्या मृत्यूने त्यांच्या कुटुंबीयांवर दुःखाचा मोठा डोंगर कोसळला आहे.

पाचरणे (वय ५६) असे या शिक्षिकेचे नाव असून त्या नारायणगाव परिसरातील कांदळी भागात राहत असल्याची माहिती समोर आली आहे. त्या कांदळी येथून नारायणगाव येथे असणाऱ्या आनंदवाडी जिल्हा परिषद शाळेमध्ये कार्यरत होत्या. सकाळी आपल्या घरातलं आवरून त्या अध्यापनासाठी आपल्या शाळेकडे निघाल्या होत्या. मात्र, नारायणगावच्या अलीकडे असलेल्या मुक्ताई ढाबा परिसरामध्ये हा भीषण अपघात झाला. यामध्ये त्यांचा जागेवरच मृत्यू झाला आहे. या शिक्षिकेला दोन मुले असून त्यातील एक दिव्यांग आहे. त्यांचे पती देखील निवृत्त शिक्षक आहेत. त्यांच्या जाण्याने पाचारणे कुटुंबावर दुःखाचा डोंगर कोसळला आहे.या गाडीत खेड तालुक्यातील काही व्यक्ती होत्या. कार्यक्रमानिमित्त त्या आपल्या पाहुण्यांकडे आल्या होत्या. मात्र, घरी पोहचण्याअगोदरच त्यांचा मृत्यू झाला आहे.
या अपघातामध्ये जवळपास नारायणगाव परिसरामध्ये राहणारेच नागरिक आहेत. सर्वजण काही ना काही कामानिमित्त नारायणगावच्या दिशेने निघाले होते. मात्र नारायणगावला पोहोचण्या अगोदरच त्यांच्यावर काळाने घाला घातला. अंगावर शहारे आणणारा हा अपघात अनेकांच्या मनाला चटका देऊन जाणार आहे. कारण दररोज आपल्यात वावरणारी माणसे आता यानंतर आपल्या नजरेसमोर नसणार आहेत.