पालकमंत्री लवकरच? अंतिम निर्णयासाठी महायुतीच्या नेत्यांची दोन दिवसांत होणार बैठक.

येत्या दोन दिवसांत पालकमंत्रिपदाच्या वाटपाबाबत महायुतीच्या नेत्यांची बैठक होणार आहे. ज्या जिल्ह्यातील पालकमंत्रिपदाबाबत वाद आहेत, त्यावर या बैठकीत तोडगा काढत पालकमंत्रिपदे जाहीर केली जाणार असल्याचे कळते.प्रजासत्ताकदिन जवळ येत असल्याने जिल्हा मुख्यालयात पालकमंत्र्यांच्या हस्ते ध्वजवंदन व्हावे, यासाठी येत्या दोन दिवसांत पालकमंत्रिपदाच्या वाटपाबाबत महायुतीच्या नेत्यांची बैठक होणार आहे. ज्या जिल्ह्यातील पालकमंत्रिपदाबाबत वाद आहेत, त्यावर या बैठकीत तोडगा काढत पालकमंत्रिपदे जाहीर केली जाणार असल्याचे कळते.

राज्य मंत्रिमंडळाचा विस्तार होऊन महिना उलटून गेल्यानंतरही महायुती सरकारकडून पालकमंत्रिपदाचे वाटप अद्याप झालेले नाही. साहजिकच यामुळे विरोधकांकडून या दिरंगाईबद्दल सरकारवर टीका केली जात आहे. महायुतीमधील तीनही पक्षांमध्ये पालकमंत्रिपदावरून जोरदार रस्सीखेच असल्याने हे वाटप रखडल्याचे समजते. यासर्व पार्श्वभूमीवर यासंदर्भात येत्या दोन दिवसांत बैठक घेऊन पालकमंत्रिपदाबाबत अंतिम चर्चा करून नावे निश्चित करण्याचे महायुतीच्या नेत्यांनी ठरवल्याचे समजते. मुख्यमंत्री देवेंद्र फडणवीस स्वत: ही नावे जाहीर करणार असल्याचे कळते.रायगड, बीड, सातारा,जळगाव यासारख्या जिल्ह्यांच्या पालकमंत्रिपदावरून वाद असल्याचे समजते. बीडमध्ये धनंजय मुंडे आणि पंकजा मुंडे हे दोन मंत्री पालकमंत्रिपदाचे प्रमुख दावेदार आहेत. मात्र संतोष देशमुख हत्याप्रकरणी धनंजय मुंडे यांच्या मंत्रिपदाच्या राजीनाम्याची मागणी केली जात आहे. तसेच बीडमधील हत्याप्रकरणानंतर मुख्यमंत्र्यांनीच पालकमंत्रिपद स्वीकारावे, अशी मागणीही केली जात आहे. त्यामुळे पालकमंत्रिपदाबाबत सरकारच्या भूमिकेकडे सर्वांचे लक्ष आहे. राष्ट्रवादी काँग्रेसच्या मंत्री अदिती तटकरे आणि शिवसेनेचे मंत्री भरत गोगावले यांच्यामध्ये रायगडच्या पालकमंत्रिपदावरून रस्सीखेच सुरू असल्याची चर्चा आहे. त्यामुळे रायगडमध्ये राष्ट्रवादी पालकमंत्रिपद कायम ठेवणार की शिंदे गटाला मिळणार, याबाबत उत्सुकता आहे.सातारा जिल्ह्यात तब्बल ४ मंत्री असून यात भाजपचे शिवेंद्रसिंहराजे भोसले, जयकुमार गोरे, शिवसेना शिंदे गटाचे शंभूराज देसाई आणि राष्ट्रवादी काँग्रेसचे मकरंद पाटील यांचा समावेश आहे. त्यामुळे या चारही मंत्र्यांपैकी कोणाला पालकमंत्रिपद द्यायचे, यावरून खल सुरू असल्याचे समजते. जळगाव जिल्ह्यात गिरीश महाजन, गुलाबराव पाटील, संजय सावकारे असे तीन कॅबिनेट मंत्री आहेत. त्यामुळे जिल्ह्यातील पालकमंत्रिपदावर अजूनही शिक्कामोर्तब झालेले नाही.पुढील आठवड्यात प्रजासत्ताकदिन आहे. या दिवशी जिल्ह्या मुख्यालयात पालकमंत्र्यांच्या हस्ते ध्वजवंदन केले जाते. त्यामुळे सरकारकडून पालकमंत्रिपदाची नावे पुढील काही दिवसांत जाहीर होणे आवश्यक आहे. त्यानुसार ही बैठक असल्याचे समजते. मात्र या बैठकीत तोडगा न निघाल्यास ध्वजवंदनासाठी तात्पुरत्या स्वरूपात मंत्र्यांची नावे निश्चित करीत नंतरही यावर तोडगा निघू शकतो, असेही सांगितले जात आहे. मागील सरकारच्या कार्यकाळातही पालकमंत्रिपदावरून घोळ सुरू होता. त्यावेळी जिल्ह्यातील वरिष्ठ मंत्र्यांच्या हस्ते ध्वजवंदन करण्यात आले होते. त्यामुळे यंदा तोच कित्ता गिरवणार की पालकमंत्री निश्चित होणार, याबाबत निर्णयाकडे लक्ष आहे.