अत्याचार करून दोन अल्पवयीन बहिणींची हत्या, पुण्यात आई-वडिलांचा आक्रोश

राजगुरूनगर येथे दोन लहान मुलींवर बलात्कार करून हत्या करणारा हॉटेलमधील वेटर अजय दास (५४, रा. पश्चिम बंगाल) याला पोलिसांनी अटक केली आहे.कल्याणमधील अल्पवयीन मुलीवरील बलात्कार व हत्या प्रकरणाचे तीव्र पडसाद उमटत असतानाच मुलींवरील अत्याचाराचे सत्र कायम आहे. पुणे जिल्ह्यातील राजगुरुनगरमध्ये हॉटेलमधील एका वेटरने आठ आणि नऊ वर्षांच्या सख्ख्या बहिणींवर बलात्कार करून त्यांची हत्या केल्याचा आणि दोघींचेही मृतदेह दोन दिवस पाण्याच्या बॅरलमध्ये लपवून ठेवल्याचा नृशंस प्रकार उघडकीस आला आहे. दुसरीकडे, लोणावळ्याजवळील विसापूर किल्ल्यावर एका पोलिसानेच मद्यधुंद अवस्थेत एका चिमुरडीशी लैंगिक चाळे केल्याने संतापाची लाट पसरली.

राजगुरूनगर येथे दोन लहान मुलींवर बलात्कार करून हत्या करणारा हॉटेलमधील वेटर अजय दास (५४, रा. पश्चिम बंगाल) याला पोलिसांनी अटक केली आहे. दास याने या मुलींवर बलात्कार करून मृतदेह स्वत:च्या राहत्या खोलीतल्या पाणी भरण्याच्या बॅरलमध्ये भरून ठेवले होते. या मुलींच्या घराशेजारीलच एका बीअर बारमध्ये अजय दास वेटर म्हणून काम करतो. दोन्ही पीडित मुली बुधवारी दुपारपासून बेपत्ता झाल्यानंतर शोधाशोध सुरू झाली. मात्र, त्या न सापडल्याने पालकांनी संध्याकाळी खेड पोलिसांत त्या हरवल्याची तक्रार दिली. हे कुटुंब बाहेरगावाहून मोलमजुरीसाठी येथे आले आहे. हरवलेल्या मुलींचा तपास करताना पोलिसांना खबऱ्यामार्फत माहिती मिळाल्यानंतर पोलिसांनी मुलींच्या कुटुंबाचे वास्तव्य असलेल्या चाळीलगतच्या बारमध्ये काम करणाऱ्या मुलांच्या खोलीची झडती घेतली. त्या वेळी अवघे गुडघाभर पाणी असलेल्या एका बॅरलमध्ये भरून ठेवलेले दोघींचे मृतदेह आढळले. दोन्ही मृतदेह चांडोली ग्रामीण रुग्णालयात विच्छेदनासाठी नेण्यात आले.

दरम्यान, मृत मुलींच्या नातेवाइकांनी ठिय्या आंदोलन करून हा तपास द्रुतगतीने करून आरोपीला फाशीची शिक्षा द्यावी, समाजाला ‘ॲट्रॉसिटी’ कायद्यान्वये संरक्षण द्यावे आणि आर्थिक मदत करावी, या मागण्यांसाठी गुरुवारी सकाळपासून ठिय्या आंदोलन केले. आरोपीला अटक करेपर्यंत मृतदेह ताब्यात घेणार नाही, अशी भूमिका त्यांनी घेतली. सुमारे नऊ तासानंतर सायंकाळी हे आंदोलन मागे घेण्यात आले.विसापूर किल्ल्यावर बंदोबस्तासाठी नेमलेल्या पोलिस शिपायाने दारूच्या नशेत पाच वर्षांच्या बालिकेशी अश्लील चाळे केल्याची संतापजनक घटना बुधवारी दुपारी घडली. या प्रकरणी लोणावळा ग्रामीण पोलिसांनी नराधम पोलिस शिपायाला अटक करून विविध कलमांतर्गत गुन्हा दाखल केला आहे. सचिन वसंत सस्ते ( ४३, सध्या रा. महंमदवाडी, हडपसर, मूळ रा. जेजुरी) असे पोलिसाचे नाव आहे.कल्याणमधील अल्पवयीन मुलीवरील बलात्कार व हत्येचा खटला जलदगती न्यायालयात चालवून नराधमाला फाशीसारखी कठोर शिक्षा होईल, असे उपमुख्यमंत्री एकनाथ शिंदे यांनी गुरुवारी सांगितले. कल्याण- डोंबिवलीचे खासदार डॉ. श्रीकांत शिंदे हे पीडितेच्या कुटुंबाला भेटून आले, असे नमूद करीत एकनाथ शिंदे यांनी पीडितेच्या कुटुंबीयांच्या पाठिशी खंबीरपणे उभे असल्याचे स्पष्ट केले.