पेनाच टोपण तोंडात गेलं, शिक्षकांनी पाहिलं पण काही कळायच्या आत नको ते घडलं; पालकांनो मुलांकडे लक्ष द्या

पेनाच टोपण तोंडात गेलं, शिक्षकांनी पाहिलं पण काही कळायच्या आत नको ते घडलं; पालकांनो मुलांकडे लक्ष द्या

धुळे : धुळे तालुक्यातील निमखेडी गावात गुरुवारी दुपारी पेनाचं टोपण घशात अडकल्याने सात वर्षीय विद्यार्थिनीचा दुर्दैवी मृत्यू झाल्याची घटना घडली आहे. मृत विद्यार्थिनीचं नाव अर्चना खैरनार (वय ७) असून, ती निमखेडी येथील जिल्हा परिषद शाळेत शिक्षण घेत होती.

गुरुवारी १२ डिसेंबर रोजी दुपारी ४ वाजण्याच्या सुमारास अर्चना अभ्यास करत असताना तिने पेनाचं टोपण तोंडात धरलं होतं. अचानक ते टोपण तिच्या घशात अडकलं, त्यामुळे तिला श्वास घेण्यास त्रास होऊ लागला. शिक्षकांच्या ही बाब लक्षात येताच त्यांनी पाठीवर थपथपी मारून टोपण काढण्याचा खूप प्रयत्न केला. मात्र, प्रयत्न असफल ठरल्यानंतर अर्चनाला नातेवाईक आणि शिक्षकांच्या मदतीने धुळे येथील शासकीय रुग्णालयात दाखल करण्यात आलं. मात्र, श्वास गुदमरल्याने रुग्णालयातच तिचा दुर्दैवी मृत्यू झाला.
या घटनेमुळे संपूर्ण गावात शोककळा पसरली असून, शाळा परिसरातही हळहळ व्यक्त होत आहे. अर्चनाच्या आकस्मिक मृत्यूने शिक्षक, सहकारी विद्यार्थी आणि पालक यांच्यावर दु:खाचा डोंगर कोसळला आहे.मुख्याध्यापक सुहास जैन यांनी अर्चनाबद्दल दुःख व्यक्त करताना ती अतिशय हुशार विद्यार्थिनी असल्याचं सांगितलं. या घटनेने मुलांच्या सुरक्षिततेबाबत सावधगिरी बाळगण्याची गरज अधोरेखित केली आहे. पालक आणि शिक्षकांनी मुलांच्या सवयींकडे अधिक लक्ष देणं गरजेचं असल्याचं मत व्यक्त होत आहे.