भाजप नेत्यावर अत्याचाराचा आरोप, गुन्हा दाखल होताच फरार

भाजपाच्या जिल्हा उपाध्यक्षावर 23 वर्षीय तरुणीवर अनेकदा बलात्कार केल्याचा आरोप झाला आहे. गुन्हा दाखल झाल्यानंतर सोलंकी फरार झाला असून त्याने पक्षाचा राजीनामा देखील दिलाय आणि तो स्वीकारण्यात आलाय. पोलिसांनी तपास सुरू केलाय. मध्य प्रदेशच्या विदिशा जिल्हात एक धक्कादायक घटना घडली आहे. 23 वर्षीय मुलीवर अनेकदा बलात्कार करण्यात आला. हैराण करणारे म्हणजे आरोपी हा थेट भाजपाच्या जिल्हा उपाध्यक्ष आहे. यामुळे मोठी खळबळ निर्माण झालीये. मुलीच्या तक्रारीनंतर पोलिसांकडून याप्रकरणी गुन्हा हा दाखल करण्यात आलाय. गुन्हा दाखल होताच, आरोपी फरार झाला असून त्याचा शोध पोलिसांकडून घेतला जातोय. याबद्दलची सविस्तर माहिती ही पोलिस निरीक्षक आशुतोष सिंह राजपूत यांनी दिली आहे.

आशुतोष सिंह राजपूत यांनी म्हटले की, भारतीय दंड संहितेच्या कलम 376 (बलात्कार) नुसार विदिशा जिल्हा भाजप उपाध्यक्ष योगेंद्र सिंग सोलंकी याच्यावर बलात्काराचा गुन्हा दाखल करण्यात आला आहे. यासोबतच 506 अंतर्गत देखील गुन्हा दाखल करण्यात आला. मुलीने दाखल केलेल्या तक्रारीच्या आधारे 5 डिसेंबर रोजी एफआयआर नोंदवण्यात आला होता. याप्रकरणी तपासाच्या आधारे पुढील कारवाई केली जाईल, असेही पोलिसांकडून सांगण्यात आलंय. बलात्काराचा गुन्हा दाखल झाल्यानंतर आरोपीने रविवारी रात्री आपल्या पदाचा राजीनामा दिला. आपल्याला याप्रकरणी फसवले जात असल्याचा देखील आरोप योगेंद्र सिंग सोलंकी याने केलाय. आरोपीने आपल्या राजीनाम्यात म्हटले आहे की, जोपर्यंत तो बलात्काराच्या आरोपातून निर्दोष मुक्त होत नाही तोपर्यंत पक्षाच्या बाहेर राहायचे आहे. विदिशा भाजपचे जिल्हाध्यक्ष राकेश सिंह जदौन यांनी देखील याप्रकरणी मोठे भाष्य केले आहे. राकेश सिंह जदौन हे म्हणाले की, योगेंद्र सिंग सोलंकी हा पक्षाचा सदस्य नाहीये. त्याचा राजीनामा सोमवारी मिळाला आणि तो स्वीकारण्यात देखील आलाय. पोलिस अधीक्षक रोहित केशवानी यांनी सांगितले की, पीडितेचे अनेक दिवसांपासून लैंगिक शोषण होत होते. आरोपी हा पीडितेच्या घरी पोहोचला होता. पोलिसांनी पीडितेचा वैद्यकीय अहवाल प्रयोगशाळेत पाठवला आहे. तो अहवाल आल्यानंतर वेगाने कारवाई केली जाईल असेही स्पष्ट करण्यात आलंय. पीडितेने पोलिसांना सांगितले की, आरोपी हा एकदा तिच्या घरी आला होता. त्यावेळी तिचे घरचे बाहेर गेले होते, त्याने बळजबरी करत बलात्कार केला. त्यानंतर तिला धमकावण्यात आले. संधी मिळेल, तसे तो पीडितेच्या घरी येत आणि बलात्कार करत.