Rajendra Nikam
चाळीसगावात महाविकास आघाडीत बिघाडी, उन्मेष पाटील यांची उमेदवारी धोक्यात?
चाळीसगावात महाविकास आघाडीत बिघाडी होण्याची शक्यता आहे. ठाकरे गटाचे नेते उन्मेष पाटील यांना पक्षाकडून चाळीसगाव विधानसभेतून उमेदवारी जाहीर करत एबी फॉर्म दिल्याची माहिती पाटील यांच्या कुटुंबियांनी दिली. यानंतर चाळीसगाव विधानसभेच्या जागेवरून आता शिवसेना ठाकरे गट तसेच राष्ट्रवादी शरद पवार गटामध्ये वाद बघायला मिळत आहे. चाळीसगावातील शरद पवार गटाचे माजी आमदार तथा जिल्हा अध्यक्ष प्रमोद पाटील हे तातडीने मुंबईला रवाना झाले आहेत. “चाळीसगाव विधानसभेची जागा ही राष्ट्रवादी काँग्रेस शरदचंद्र पवार पक्षाचीच आहे. माजी आमदार राजीव देशमुख यांनी माझ्यासाठी पक्षाकडे उमेदवारी मागितली आहे. चाळीसगाव विधानसभेची जागा मी लढवावी यासाठी मला आग्रह केलेला आहे. आम्ही आमच्या भूमिकेवर ठाम आहोत. चाळीसगाव विधानसभेची उमेदवारी राष्ट्रवादी शरदचंद्र पवार पक्षालाच मिळेल”, अशी भूमिका प्रमोद पाटील यांनी मांडली आहे.
प्रमोद पाटील यांचा नेमका दावा काय?
माहिती मिळाली की, उन्मेष पाटील एबी फॉर्म घेऊन आले. अजून जागा वाटपाची घोषणाचं नाही तर उन्मेष पाटील एबी फॉर्म कसं काय घेऊन आले? याचं आम्हाला आश्चर्य वाटत आहे. उन्मेष पाटील यांच्या परिवारातील सदस्यांनी भूमिका मांडली की, आम्ही राजू देशमुखांचे आभार मानतो. पण राजीव देशमुख ही जागा माझ्यासाठीच मागत आहेत”, असं प्रमोद पाटील म्हणाले. बातमी ऐकल्यानंतर आम्ही सर्वजण मुंबईला जायला निघालो आहोत. चाळीसगाव विधानसभेची जागा राष्ट्रवादीलाच मिळावी ही भूमिका माजी आमदार राजीव देशमुख यांची स्पष्ट आहे. असं असताना अशा प्रकारच्या प्रतिक्रिया येणे याचं मला मोठं आश्चर्य वाटत आहे. चाळीसगाव विधानसभेची जागा ही राष्ट्रवादीचीच आहे एवढेच मी या निमित्ताने सांगतो”, असं शरद पवार गटाचे जिल्हाध्यक्ष प्रमोद पाटील म्हणाले.
