Rajendra Nikam
नांदेड-मुंबई व नांदेड-गोवा विमानसेवा १५ नोव्हेंबरपासून सुरू! खासदार अशोकराव चव्हाण यांच्या पाठपुराव्याला यश..
विषेश प्रतिनिधी : शिवानंद पांचाळ नायगांवकर नांदेड : खासदार अशोकराव चव्हाण यांच्या सातत्यपूर्ण पाठपुराव्यानंतर अखेर नांदेडकरांची प्रतीक्षा संपली आहे. नांदेड-मुंबई आणि नांदेड-गोवा विमानसेवा येत्या १५ नोव्हेंबरपासून सुरू होणार असून, या दोन्ही सेवांचे संचालन स्टार एअर कंपनी करणार आहे.
दोन्ही सेवा आठवड्याचे सातही दिवस उपलब्ध असतील. मुंबई-नांदेड फ्लाइट : दुपारी ४.४५ वाजता मुंबईहून उड्डाण करून ५.५५ वाजता नांदेडला पोहोचेल. परतीचे उड्डाण ६.२५ वाजता नांदेडहून होऊन ७.३५ वाजता मुंबईत उतरेल. गोवा-नांदेड फ्लाइट : गोव्याच्या मोपा विमानतळावरून १२ वाजता उड्डाण करून १ वाजता नांदेडला येईल. परतीचे उड्डाण १.३० वाजता नांदेडहून होऊन २.४० वाजता गोव्यात पोहोचेल. नांदेड-मुंबई सेवेसाठी छत्रपती शिवाजी महाराज आंतरराष्ट्रीय विमानतळावर स्लॉट मंजूर झाला आहे. या नव्या उड्डाणांमुळे नांदेड, परभणी, हिंगोली आणि लातूर जिल्ह्यातील प्रवाशांना मोठी सोय होणार आहे. नांदेडहून आता एकूण ७ शहरांसाठी विमानसेवा उपलब्ध असून, खासदार अशोकराव चव्हाण यांनी सांगितले की पुढील उद्दिष्ट तिरूपती, शिर्डी आणि कोल्हापूरसाठी थेट उड्डाणे सुरू करण्याचे आहे.
