महिला शेतमजुरांवर कोसळली वीज, अस्मानी आघातामुळे दोघींचा चटका लावणारा अंत; परिसर हळहळला.

रामटेक तालुक्यातील चारगाव शिवारात शुक्रवारी दुर्दैवी घटना घडली. वीज कोसळून दोन महिला शेतमजुरांचा जागीच मृत्यू झाला आहे. तर पाच महिला गंभीर जखमी झाल्या आहेत. रामटेक तालुक्यातील चारगाव शिवारात शुक्रवारी दुर्दैवी घटना घडली. वीज कोसळून दोन महिला शेतमजुरांचा जागीच मृत्यू झाला आहे. तर पाच महिला गंभीर जखमी झाल्या आहेत. शेतात रोजंदारीवर धान रोवणीचे काम सुरू असताना अचानक आकाशातील संकटामुळे दोन कुटुंबांवर दुःखाचा डोंगर कोसळला. या दुर्घटनेने परिसरात हळहळ व्यक्त केली जात आहे.रामटेक तहसील येथील शितलवाडी-चारगाव रस्त्यालगत असलेल्या शेतकरी रमेश जगन्नाथ रहाटे यांच्या शेतात ही घटना घडली. मृत महिलांची नावे मंगलाबाई झिबल मोटघरे (४०, रा. शितलवाडी, परसोडा) आणि वर्षा देवचंद हिंगे (३३, रा. भोजापूर) अशी आहेत.

दोघीही अनुभवी आणि नियमित मजुरी करणाऱ्या महिला होत्या. शुक्रवारी दुपारी सुमारास सुमारे २५ महिला धान रोवणीसाठी शेतात काम करत होत्या. त्यातील सात महिला जेवणासाठी थोडे बाजूला झाडाखाली बसल्या होत्या. त्याचवेळी वीजेच्या कडकडाटासह जोरदार पाऊस सुरू झाला. काही क्षणांतच प्रचंड गडगडाट करत वीज थेट या महिलांच्या दिशेने आली आणि त्या जागीच कोसळल्या.घटनास्थळी गोंधळाची परिस्थिती निर्माण झाली. शेतकरी रमेश रहाटे आणि त्यांच्या मित्रांनी सुनील देवगडे यांच्या मदतीने जखमींना तातडीने रामटेक येथील उपजिल्हा रुग्णालयात हलवले. जखमींची प्रकृती गंभीर असल्याचे वैद्यकीय सूत्रांनी सांगितले आहे, त्यांच्यावर उपचार सुरू आहेत.

घटनेची माहिती मिळताच तहसीलदार रमेश कोळपे आणि रामटेक पोलीस ठाण्याचे निरीक्षक रवींद्र मानकर घटनास्थळी दाखल झाले. त्यांनी पंचनामा करत संपूर्ण माहिती जिल्हाधिकाऱ्यांकडे पाठवली.अतिवृष्टी आणि हवामानातील बदलामुळे शेतात काम करणाऱ्या मजुरांची जीवितहानी टाळण्यासाठी आवश्यक ती सुरक्षितता आणि यंत्रणा उपलब्ध करून देण्याची मागणी ग्रामस्थांनी केली आहे. प्रशासनाने या घटनेतील मृतांच्या कुटुंबियांना तातडीने आर्थिक मदत जाहीर करावी, अशी मागणीही परिसरातून होत आहे. या दुर्दैवी घटनेमुळे शितलवाडी, भोजापूर आणि चारगाव परिसरात शोककळा पसरली आहे.