Rajendra Nikam
मराठी ज्येष्ठ अभिनेते मनमोहन माहिमकर आर्थिक अडचणींचा सामना करत आहेत. अशातच आता उपमुख्यमंत्री एकनाथ शिंदे यांनी अभिनेत्याला मदत केली आहे.ज्येष्ठ मराठी अभिनेते मनमोहन माहिमकर यांनी काही दिवसांपूर्वी ‘लोकमत मराठी’ला दिलेल्या मुलाखतीदरम्यान त्यांच्या संघर्षाबद्दल सांगितलं आहे. सध्या त्यांना कोणीही सिनेमामध्ये काम देत नाहीये त्यामुळे त्यांची आर्थिक परिस्थिती खूप खालावली आहे. इतकंच नव्हे तर ते गिरगाव येथे पागडीवर राहत असताना त्यांच्या इमारतीच्या मालकाने इमारतीचा पुनर्विकास करण्याचा निर्णय घेतला. मात्र, इमारत रिडेव्हलप होणार हे समजताच मनमोहन माहिमकर यांच्या नातेवाईकांनी घरावर हक्क दाखवला. त्यामुळे त्यांना विकासाकडून मिळणारं भाडं बंद झालं. त्यामुळे या सर्व त्रासाला कंटाळून माहिमकरांनी राज्यपालांकडे इच्छामरणासाठी अर्ज केला होता. अशातच आता मराठी अभिनेता आणि शिवसेना चित्रपट सेनेचा अध्यक्ष सुशांत शेलारने माहिमकरांना मदत करण्याचा निर्णय घेतला आहे.
लोकमत फिल्मीला दिलेल्या मुलाखतीमध्ये माहिमकर म्हणाले होते की, ‘मला आता कामच मिळत नाहीये, मी खूप सिनेमे केले, मालिका केल्या पण आता मला अजिबात काम नाहीये. सरकार मला फक्त महिन्याला पाच हजार रुपये देतं. त्यातच माझं सगळं घर चालतं. मंत्रालयातून उडीसुद्धा मारायला लागेल, अशी माझ्यावर वेळ येईल. साईबाबांना मी साकडं घालतो, बाबा मला खाली उडी मारायची बुद्धी देऊ नका. मला खूप त्रास होतोय. मला मालिकांमध्ये काम मिळावं असं काहीतरी करा. काम मिळत नाहीये त्यामुळे मी पोरका आहे. मी एकटा राहतो. माझ्याकडे खाण्यासाठी पैसे उरलेच नाहीयेत, त्यामुळे ही माझी इतर काही खाण्याची इच्छा मारतो. कोण आता मला बघायला तयार नाहीये, वय झाल्यामुळे.’आर्थिक अडचणींना सामोरं जात असलेले मनमोहन माहिमकर यांच्या मदतीसाठी सुशांत शेलार धावून आला आहे.
