चिंब पावसानं आबादानी ! नाशिकमधील सात धरणे ‘ओव्हरफ्लो’; विसर्ग सुरु असूनही पाणीसाठा ६३ टक्क्यांवर.

जिल्ह्यावर पावसाची कृपावृष्टी झाली पावसामुळे धरणांमधील पाणीसाठ्यात झपाट्याने वाढ होत आहे. आतापर्यंत तीन धरण समूहांमधील आळंदी, भावली, वालदेवी, भाम, भोजापूर, हरणबारी आणि केळझर ही सात धरणे भरून वाहू लागली आहेत.वरुणराजा जिल्ह्यावर मेहेरबान झाला असून, पावसामुळे धरणांमधील पाणीसाठ्यात झपाट्याने वाढ होत आहे. आतापर्यंत तीन धरण समूहांमधील आळंदी, भावली, वालदेवी, भाम, भोजापूर, हरणबारी आणि केळझर ही सात धरणे ओव्हरफ्लो झाली आहेत. तब्बल १४ धरणांमधून विसर्ग सुरू असूनही धरणांमधील एकूण पाणीसाठा ६२.७५ टक्क्यांवर पोहोचला आहे.पावसाचा हंगाम सुरू होऊन सव्वा महिना झाला आहे. जूनमध्ये सरासरीच्या १२६ टक्के पाऊस झाला.

जुलैमध्ये देखील सुरुवातीपासूनच पावसाचा चांगला जोर पहायला मिळत आहे. विशेषत: पाणलोट क्षेत्रात चांगला पाऊस सुरू असल्याने धरणांमधील पाणी साठ्यात झपाट्याने वाढ होत आहे.गंगापूर, पालखेड आणि गिरणा धरण समूहामधील सात धरणे १०० टक्के भरली आहेत. ही धरणे ओव्हरफ्लो झाली असून त्यांमधून विसर्ग सुरू ठेवण्यात आला आहे. पहिल्या सव्वा महिन्यांतच ही धरणे काठोकाठ भरली असून, अजून किमान पावणेतीन महिने पावसाळा सुरू राहणार आहे. त्यामुळे यंदा धरणांमधून जायकवाडीच्या दिशेने मोठ्या प्रमाणावर विसर्ग होण्याची शक्यता वर्तविली जात आहे.गंगापूर आणि पालखेड धरण समूहांच्या पाणलोट क्षेत्रात गेले दोन दिवस मुसळधार पाऊस झाला.

त्यामुळे या धरण समूहांमधील गंगापूर, काश्यपी, आळंदी, पालखेड, पुणेगाव, दारणा, भावली, मुकणे, वालदेवी, कडवा या धरणांमधून नांदूर मध्यमेश्वरमार्गे मराठवाड्यातील जायकवाडी धरणात पाण्याचा मोठ्या प्रमाणावर विसर्ग सुरू आहे. गेल्या दोन दिवसांत तब्बल सहा टीएमसी पाणी जायकवाडीकडे झेपावल्याची माहिती पाटबंधारे विभागातील सूत्रांनी दिली. आतापर्यंत २० हजार ८२२ दशलक्ष घनफूट म्हणजेच तब्बल २१ टीएमसी पाणी वहनमार्गाने छत्रपती संभाजीनगर जिल्ह्यातील जायकवाडी धरणाकडे गेल्याची माहिती प्रशासनाने दिली.