भडगाव ग्रामीण रुग्णालयाची दयनीय अवस्था – ऑपरेशन थिएटरमध्ये पाणी गळती.

“रुग्णांसाठी उभं केलेलं रुग्णालय, आज स्वतः बनलंय रुग्ण!”भडगाव : गोरगरीब रुग्णांसाठी आशेचं केंद्र असलेलं भडगावचं ग्रामीण रुग्णालय सध्या स्वतःच गंभीर आजाराने ग्रस्त झालं आहे. रुग्णांवर उपचार व्हावेत म्हणून उभं केलेलं हे रुग्णालय, आज स्वतः उपचाराच्या प्रतीक्षेत उभं आहे.

सध्या सोशल मीडियावर आणि स्थानिक माध्यमांतून एक धक्कादायक दृश्य समोर आलं आहे. ग्रामीण रुग्णालयातील ऑपरेशन थिएटरमधील छतामधून सतत पाणी गळत आहे, आणि हे पाणी थेट ऑपरेशन थिएटरच्या आत पडत आहे. ही बाब केवळ आरोग्याच्या दृष्टीने धोकादायक नाही, तर वैद्यकीय नैतिकतेवरही मोठा प्रश्नचिन्ह उभा करते. ही परिस्थिती केवळ एका खोलीपुरती मर्यादित नाही – संपूर्ण रुग्णालयात पाणी गळती, भिंतींची नासधूस, स्वच्छतेचा अभाव आणि पायाभूत सुविधांची दुरवस्था दिसून येते. या ठिकाणी उपचारासाठी येणाऱ्या सर्वसामान्य रुग्णांची हेळसांड होत आहे.परंतु सर्वात चिंताजनक बाब म्हणजे या सर्व परिस्थितीकडे शासकीय इमारतींची जबाबदारी घेणाऱ्या सार्वजनिक बांधकाम विभागानेच आज डोळेझाक केली आहे.