निळ्या ड्रममधून प्रचंड दुर्गंधी, गोणीत सापडली बॉडी; पोलिसांनी 42 कंपन्यांची यादी काढली अन्…

लुधियानामध्ये एका निळ्या ड्रममध्ये एका तरुणाचा मृतदेह आढळल्याने खळबळ उडाली आहे. अज्ञात मारेकऱ्यांनी तरुणाची हत्या करून त्याचा मृतदेह गोणीत भरून ड्रममध्ये टाकला.चंदिगढ: मेरठमध्ये घडलेलं ड्रम हत्याकांड ताजं असताना आता लुधियानात एका निळ्या ड्रममध्ये तरुणाचा मृतदेह सापडला आहे. मारेकऱ्यांनी तरुणाची हत्या करुन त्याचा मृतदेह एका गोणीत भरला. त्यानंतर तो निळ्या ड्रममध्ये भरुन फेकून दिला. या घटनेनंतर परिसरात खळबळ उडाली आहे.रस्त्याच्या शेजारी पडून असलेल्या ड्रममधून प्रचंड दुर्गंधी येत असल्यानं स्थानिकांनी याची माहिती पोलिसांना दिली. पोलिसांनी ड्रममधून गोणी बाहेर काढली. तेव्हा त्यात एक मृतदेह सापडला. तरुणाचे हात, बांध बांधलेले होते. मृतदेह जाळण्याचा प्रयत्नदेखील करण्यात आल्याचा संशय पोलिसांना आहे.

 

पोलिसांना आसपासच्या लोकांना बोलावून मृतदेहाची ओळख पटवण्याचा प्रयत्न केला. पण कोणालाही मृत तरुणाबद्दल कोणतीच माहिती नाही. पोलिसांनी मृतदेह ताब्यात घेऊन तो शवविच्छेदनासाठी पाठवला. या प्रकरणी पोलिसांनी अज्ञात हल्लेखोरांविरोधात गुन्हा नोंदवला आहे. पोलीस मृताची ओळख पटवण्याच्या प्रयत्नात आहे. मृताची ओळख पटल्यास हल्लेखोरांचा शोध घेणं सोपं होऊ शकतं.मृतदेहाचे हात, पाय बांधलेले होते. त्याच्या शरीरावर मारहाणीनंतरच्या जखमा आढळून आलेल्या आहेत. हात, पाय तोडल्यावर तरुणाची हत्या केली गेली असावी, असा संशय पोलिसांना आहे. मृतदेह गोणीत टाकून मग ड्रममध्ये भरण्यात आला. हल्लेखोरांनी मृतदेह पेटवून देण्याचा प्रयत्न केला. पोलिसांकडून या प्रकरणाचा तपास सुरु आहे.आरोपींनी हत्येआधीचा ड्रम खरेदी केला असावा अशी शंका पोलिसांना आहे. त्यामुळे पोलिसांनी तब्बल ४२ कंपन्यांची यादी तयार केली आहे. या कंपन्या प्लास्टिकचे ड्रम तयार करतात. मागील काही दिवसांत कोणी कोणी ड्रम खरेदी केले याची माहिती घेण्याचं काम पोलीस करत आहेत. सध्याच्या घडीला पोलिसांनी घटनास्थळापासून ५ किलोमीटरच्या आसपासचा परिसर धुंडाळून काढण्यास सुरुवात केली आहे. पोलीस सीसीटीव्ही कॅमेऱ्यांमध्ये कैद झालेलं फुटेजदेखील तपासत आहेत. रेल्वे स्थानक, बस आगारातील कॅमेरेही तपासले जात आहेत.
लाडोवाल टोल नाका ते शेरपूरपर्यंतच्या रस्त्यावर पोलिसांनी लक्ष केंद्रित केलं आहे. पोलिसांना काही संशयास्पद वाहनांचे क्रमांकदेखील मिळाले आहेत. घटनास्थळाच्या आसपास अनेक प्रवासी आहेत. त्यांची चौकशी केली जात आहे. मृतदेहाची अवस्था गंभीर आहे. तरुणाची हत्या नेमकी कशी आणि कोणत्या परिस्थितीत झाली, याची माहिती शवविच्छेदन अहवालातून स्पष्ट होईल.